Fajardo mitali og 50 pts. alang sa UC/ASPAC Bank

Mirehistro og bag-ong rekord ang higanteng  6'7" nga si Jun Mar Fajardo human kini mikulit og career-high 50 puntos aron pangulohan ang UC/ASPAC Bank ngadto sa 108-100 nga kadaugan batok sa USPF/R. Lapid's Chicharon sa overtime sa nagpadayong Reinforced Partner's Cup kagabii sa Cebu Coliseum.

Ang UC/ASPAC Bank gilubong og 19 puntos, apan tungod sa ilang  gipatuman nga solid halfcourt trapping defense nakabangon kini aron pagpapas sa labaw sa fourth

quarter.

Ang pito ka sunod-sunod nga puntos ni Kelvin Juliane maoy mihaling sa 12-2 run dihang ang USPF milabaw og 19 puntos, 75-57 sa fourth quarter.

Apan ang USPF kalit nga  mikulapso dihang ang UC milusad og laing 11-2 run aron  pagtabla sa iskor, 88-all  sa lay-up ni Fajardo sa nahabiling 24.1 segundos sa regulasyon.Ang USPF nakahimo og sayop sa ilang last possession nga naghatag sa UC og tsansa pagdaog,

apan si Janssen Abella nasipyat sa iyang katapusang itsa nga naghatod sa duwa ngadto sa overtime.

Si Abella miposa og three point shot nga nakapalabaw og balik sa UC, 93-92 sa nahabiling 3:43 sa overtime period ug human sa steal ni Jared Kane Abatayo, si Juliane mipatuasik og triple aron paghatag og kuwatro puntos nga bentaha sa UC, 98-94 nga nakagusbat  sa duwa sa USPF.

Gikan niadto, si Fajardo na ang mikiat og maayo nga nakapatubo sa ilang labaw ngadto sa nuybe puntos, 108-99 sa nahabiling 19.4 segundos sa dili pa mosirbato ang buzzer.