UV, Arthro moduwa sa Consolacion

Ang bag-ong gikoronahang hari sa  Cebu Schools Athletic Foundation, Inc. (CESAFI) nga mao ang University of the Visayas (UV) Green Lancers moduwa og usa ka exhibition game batok sa Arthro Kontra Arthritis  karong   nga Oktubre 18 didto sa  Consolacion Sports Complex.

  Ang maong duwa  sugdan sa alas-8:00 sa gabii.

Ang UV-Arthro goodwill game gipasiugdahan ni UV Baby Lancers coach Delfin Pepito Jr., kinsa maoy migiya  sa juniors division  pag-ilog og balik sa korona gikan  mga kamot sa   University of Cebu (UC) Junior Webmasters  pinaagi sa  pagharos og daog sa ilang  "best-of-three"  final series.

Ang Lancers ni  coach Elmer 'Boy' Cabahug mipakgang sa dautang tumong sa University of San Carlos (USC) Warriors sulod sa lima ka duwa sa ilang  "best-of-five" series  Sabado sa gabii.              

Ang  6'11"  Fil-Am nga si Gregory Fuentes Slaughter moduwa sa labing unang higayon didto sa lungsod sa Consolacion ug  seguradong  malingaw  ang  mga tawo  tungod sa iyang gitas-on. Abagan usab siya nilang  Von Harry Lanete, Chris Victor Diputado, Ritchum Dennison, Rino Berame  ug Ariel Mepana .

Ang Arthro pangulohan nilang Alex Cainglet, Mark Ababon, Ronaldo Bucao, Bernie Ursal, Jerome Gadiani  ug  Doroteo Almacin.