Mo-ulbo na

Dul-an sa 300 ka players gikan sa 27 ka tennis clubs dinhi sa Sugbu ang magtagbo aron magpuhalay sa ilang abilidad sa pagsikad sa M. Lhuillier Sports Development Foundation (MLSDF)-organized 1st M. Lhuillier Kwarta Padala Inter-Club Commercial Tennis Tournament karong alas 3:00 sa hapon diha sa Baseline tennis courts.

Sa dili pa ang aksiyon, usa ka yanong opening ceremonies ang pagabuhaton diin sila si event backer Michel Lhuillier ug MLSDF executive director Eddie Ybañez maoy mga pinasidunggang dinapit.

Si Lhuillier maoy mohimo sa ceremonial serve timaan sa pormal nga pagsugod sa usa ka semanang kompetisyon nga gikatakdang matapos karong Agosto 6.

Miabot ngadto sa 146 ka parisan ang magtige sa maong doubles competition nga gibahin-bahin ngadto sa lima ka kategoriya nga naglangkob sa A, B+, B-, C+ and C-.

Ang class C- mao ang adunay pinakadaghan nga entrante diin 64 ka parisan ang magpinaksitay, gisundan sa C+ nga adunay 34 ka partisipante. Ang class B-, B+ ug A adunay 16 ka entrante matag usa.

Tungod sa kadaghan sa mga misalmot, ang nagpasiugda sa maong torneyo nga gipangulohan ni Ritchie Bacalso mogamit og knockout format.

Mga tennis clubs nga moapil sa aksiyon mao ang Tuburan TC, Villa Aurora TC, Abigail's TC, San Carlos Seminary (SANCASE) TC, SMC TC, Aga-Gising TC, Topseed TC, Barili TC, BIR TC, Camp Lapu-Lapu TC, Carcar TC, Cebu City TC, Cecille TC, Don Bosco TC, Dumanjug TC, Eversly TC ug IBP TC.

Nagkumpleto sa listahan sa mga entrante mao ang La Paloma TC, Lapu-Lapu TC, Lilo-an TC, Linao TC, MANTADS TC, Naga TC, Pardo TC, PHO TC, Pleasant Homes TC, ug Southern Islands Medical Center TC.