Robinson nanghawod sa slam dunk; Nowitzki naghari sa 3-point shootout

Si Nate Robinson sa New York Knicks impresibong mipakita sa iyang abilidad og iyang nakuha ang titulo sa gipahigayong Slam Dunk Contest kagahapon kabahin sa National Basketball Association All-Star Games.

"When people look at me, they really don't understand where the hops are coming from," matud pang Robinson nga mipildi ni Andre Iguodala sa Philadelphia 76ers aron pagsakmit sa $35,000.

Ang rookie guard sa New York Knicks nga si Robinson nag-agi pa og kalisod iuna pa niya nakuha ang kalampusan sanglit dili usab basta-basta ang gipakitang abilidad sa swingman sa Philadelphia 76ers nga si Iguodala.

Si Robinson ug si Iguodala nagtabla sa iskor nga 94 sa final round nga miresulta sa mahinungdanon kaayong tie-breaker.

Si Robinson nakakuha og inspirasyon gikan ni Spud Webb kinsa maoy giilang pinakakurat nga 5'4" footer nga mohimo og dunk.

Si Webb kinsa migahin sa iyang experyensya, miabag ni Robinson sa kompetisyon aron paghatag og mga mangilngig nga slam dunks ngadto na sa pagmartsa sa kalampusan.

Usa sa makurat nga dunks ni Robinson mao nga si Webb iyang gipabarog sa tunga nga maoy iyang gihimong passer sa bola dayong lupad sa walay kakulba sa ulohan niini.

Samtang sa katapusan nakuha na gyud ni Dirk Nowitzki ang kampiyonato sa Shootout.

Ang power forward sa Dallas og kandidato sa Most Valuable Player karon nga season, miposte og 18 puntos aron pagpukan nila ni Gilbert Arenas sa Washington Wizards ug Ray Allen sa Seattle Supersonics.

Si Arenas mihipos og 16 puntos samtang si Allen adunay 11.