Hapee-Dewfoam subhan batok Valencia

Ipakita na sa labing unang higayon sa bag-ong team Hapee/Dewfoam-backed Mantawi Sparkling Knights ang ilang abilidad diin kini makigharong batok sa Valencia Golden Harvest sa bugtong duwa sa 2005 Panasonic-NBC national championship game diha sa Mandaue Cultural and Sports Complex.

Ang kumbati sugdan karong alas-6:00 sa gabii.

Ang Sparkling Knights pagatimonan nilang Ardy Larong, Ronald Capati ug Reed Juntilla, kinsa bag-o pang nakaduwa gikan sa PBL, ug sa beteranong playmaker Maui Huelar, kinsa usa sa mga sinaligan sa Negros Slashers sa nabungkag nga Metropolitan Basketball Association (MBA) ug ingon man sa Tribu Sugbu.

Si Huelar mi-averaged og 10 puntos ug second best assists sa nag-unang duha ka mga duwa sa Tribu Sugbu sa wala pa mobalhin sa Mantawi.

Si Larong sa laing bahin, nasakop usab sa Tribu Sugbu championship team sa miaging tuig nga naglakip usab nilang Chico Lañete, Alfie Grijaldo, Dennis Concha ug Marvin Mercado sa Granny Goose sa PBL.

Mokompleto sa ilang line-up mao sila si Marvin Tundag, Mark Moreño, Christian Antiporda, Christopher Carrestas, Michael Sereno, Jeffrey Bajenting, June Ace Ursal, Aries Gloria, Jeffrey France ug Noel Balili ug gidala kini sa beteranong coach nga si Jun Noel.

Ang ballclub nilang Jack Juang sa Hapee ug Dewey Choachy Jr. sa Dewfoam maoy ikawalo nga sakop sa expansion team sa southern conference.

Ang NBC gisuportahan usab sa Panasonic, Sulpicio Lines, Cebu Pacific, Accel, Molten, Spring Cooking Oil, Far Eastern Insurance, Nature's Spring, Skygo Motorcycles, Sirlitz Solutions Provider, Hapee Toothpaste, Dewfoam, Ping Ping Lechon, Bayview Park Hotel ug Holiday Plaza-Cebu.