La Salle at Ateneo magsasagupa para sa liderato

Lalo nang mahigpit ang labanan sa liderato sa paghaharap ngayon ng magkaribal na ICTSI-La Salle at Ateneo-Hapee sa pagpapatuloy ng semifinals ng 2002 PBL Chair-man’s Cup sa Makati Coliseum.

Ang panalo laban sa Blue Eagles sa alas-5:00 ng hapong engkuwentro ang magbibigay sa ICTSI Archers ng karapatang makisalo sa liderato.

Posibleng magkaroon ng three-way-tie sa pamumuno kung mananalo rin ang Kutitap Toothpaste laban sa Blu Detergent sa alas-3:00 ng hapon.

Ang Ateneo at La Salle ay parehong may 1-1 head-to-head record at sa di inaasahang pagkakataon, parehong liderato ang kanilang pinaglabanan sa mga nakaraang pagkikita.

Nanalo ang Ateneo sa unang pagsasagupa, 63-57 noong Abril 24 habang nakabawi naman ang Archers sa 73-64 panalo noong Mayo 8.