EDITORYAL — Middle class Angay tabangan

Karong Mayo 15 na ang deadline sa extension sa pagbayad og income tax sa mga mamumuo ug mga patigayon human nga gi-extend kini ni Presidente Ferdinand Marcos niadtong Abril tungod sa nasinating krisis sa lana karon sa nasud.

Daku-dako ang natabang sa maong extension tungod kay anang buwana, pwerteng mahala gyud sa petrolyo ug nisaka sab og maayo ang galastohan ug presyo sa mga batakang palaliton nga nakapalisod sa tanan bisan sa mga tubig-tubigang tigbayad og buhis.

Apan mas maayo unta kun ang malibre na gyud ang tanang tax payers kung pwede pa, pero ang buhis maoy nagbuhi sa gobiyerno aron makapadayon ang serbisyo publiko niini sa populasyon.

Pero naay sugyot nga patas-an pa gyud ang gidak-on sa income tax exemptions nga puydeng pahamtangan og buhis.

Si Sen. Sherwin Gatchalian nipanday karon og balaudnon para ipasar ang tax relief bill , ang tumong ani, para mas modako pa ang take-home pay  sa mga mamumuo, ilabi na ang mga middleclass earners.

Ang middle class workers dili pirmeng maapil sa mga ayuda sa gobiyerno sa panahon nga dunay mga krisis.             Gitawag kini ni Gatchalian Granting Increase in Take-Home Pay for All Working Filipinos Act, o GINHAWA.  Buot aning balaudnon nga amendahan ang kasamtangang National Internal Revenue Code  gikan sa income tax exemption nga P250,000 himuon kining P400,000 kada tuig,

Sa pagkakaron, ang mga mamumuo nga mokita og lapas P250,000 kada tuig pabayron og income tax sa Bureau of Internal Revenue.

Pagkatinuod, samtang dako og papel ang mga adunahan sa ekonomiya tungod kay silay namuhonan, apan mas dako og papel ang mga middle class nga mamumuo sa local nga ekonomiya kay sila man pud ang mga konsumidor.

Kun gamay ra kaayo pirme ang mabilin sa ilang mga sweldo tungod sa mga deductions, kontribusyon, PhilHealth, ug buhis, mohinay sab ang ilang abilidad nga makapamalit sa ilang mga panginahanglan kada adlaw ug kini direktang makaapektar sa local nga ekonomiya.

Kung matugotan kining sugyot ni Gatchalian , daghan gyud ang malipay ani ug mokusog pa gyud og maayo ang kasamtangang lokal nga ekonomiya sa nasud.

Sa miaging buwan, Abril miabot og 7.2% ang inflation rate sa nasud nga epekto sab sa krisis sa lana.