EDITORYAL – Tapyasan ang excise tax

Wala nang pinakamabuting paraan kundi suspendihin ang ipinapataw na excise tax sa petroleum products. Ito lamang ang tanging paraan para bumaba ang presyo ng gasoline, diesel at kerosene. Noong Martes, nagpatupad ng big time oil price hike ang mga kompanya ng langis: P7-13 sa gasoline at P17-24 sa diesel­. Sa susunod na Martes ay mayroon namang pag­­­tataas sa presyo ng petroleum products.

Sinamantala naman ng 55 switik na gasoline­ stations ang pagtataas. Kahit wala pang inaa­nun­siyo ang Department of Energy (DOE) nagpa­tupad na agad sila. Naging inutil naman ang DOE sapagkat hindi nabantayan ang mga suwitik at linta. Sabi ng mga jeepney drivers, wala na silang naiuuwing kita sa pamilya sapagkat napunta lamang sa diesel.

Humihiling ang jeepney operators, na dagdag­ P2 sa pamasahe. Sa kasalukuyan, P13 ang mini­mum fare sa jeepney. Humihirit din naman ng taas pasahe sa mga bus. Masyado na uma­nong apektado ang kanilang kinikita sa ipinatupad na big time oil price hike. Kung magtutuluy-tuloy ang kaguluhan sa Middle East, lalo pang tataas ang petrolyo at walang ibang apektado kundi ang mga mahihirap.

Tiyak nang magsisitaasan ang mga pangu­nahing bilihin kapag nagpatuloy ang serye ng oil price hike. Kamakalawa, nag-anunsiyo na ang Me­ralco na magtataas sila ng singil ngayong Marso.

Sa nangyayaring ito, tanging ang pagsuspinde o pagtapyas sa ipinapataw na buwis sa petrolyo ang paraan para bumaba ang gasoline, diesel at kerosene. Wala nang iba pang paraan.

Ayon sa mga eksperto, kapag tinapyasan ang excise tax sa mga produktong petrolyo, ang bawat litro ng gasoline ay magiging P10 at ang diesel ay P5. Malaking kabawasan ito at mapapagaan ang pasanin ng mamamayan.

Pero sabi ng Malacañang, kailangan pang du­maan sa Kongreso ang pagtapyas sa excise tax. Noong Lunes, ipinadala ng Malacañang ang re­quest sa Kongreso para bigyan siya ng emergency powers para matapyasan ang excise tax.

Sa Lunes pa umano malalaman ang sagot ng Kongreso sa hinihinging emergency powers.

Hindi naman dapat patagalin pa ng Kongreso­ ang pagkakaloob ng emergency powers­ sa Pre­sidente. Dapat umaksiyon agad ang Kon­greso. Nakasaad naman sa TRAIN Law na kapag uma­bot sa $80 bawat bariles ng langis, awtomatik na suspendido na ang excise tax.

Madaliin sana ang pagbibigay ng emer­gency powers. O kung ayaw nilang tapyasan ang excise tax, bigyan ng fuel subsidy ang mga drayber ng pampublikong sasakyan.