Druglord magmayor?

Daghan nga anggulo ang angay’ng tan-awon sa mga nag-imbestigar sa nahitabong pagpusil sa miangkong druglord nga si Kerwin Espinosa, kinsa milansar karon sa pagka mayor sa lungsod sa Albuera, Leyte.

Mitingkag ang akong dunggan pagkadungog nga gipusil si Kerwin samtang nangampanya siya uban sa iyang mga kaalyadong kandidato didto sa Barangay Tinag-an, Albuera, Leyte kaniadtong Huwebes sa hapon.

Si Kerwin anak sa kanhi mayor sa Albuera nga si Rolando Espinosa, kinsa napatay sa kapolisan samtang gipriso siya sa Provincial Jail sa Leyte kay kuno misukol diha nga i-search unta ang iyang selda.

Daghan ang nakapahiyom diha nga si Kerwin, 47-anyos na ug giila nga labing dakong druglord sa Eastern Visayas ug nadakpan atol sa administrasyon ni kanhi Presidente Duterte, karon gusto na nga magmayor.

Misamot nga daghan ang nahimuot kay si Kerwin nga miangkong druglord naghulma og grupo nga gibunyagan niya og Bando Espinosa Pundok Kalamboan (BOPK) ug sumpoon kuno niya ang ilegal nga drugas kon siya modaog pagka mayor.

Nakagawas sa bilanggoan si Kerwin kay gibasura sa hukmanan ang mga kasong kriminal nga gipasaka sa kapolisan batok kaniya tungod sa kakuwang og mga ebidensya.

Ang pangutana karon, kinsa man kaha ang nagtinguha sa pagpatay ni Kerwin? Mga polis ba kaha nga nabalaka nga kon modaog si Kerwin mobalik ang pagdagsang sa drugas sa Leyte?

Buyno, dili sab imposible. Apan duna sa’y posibilidad nga may mga tawo kang kansang mga anak nagumon sa ilegal nga drugas tungod sa negosyo ni Kerwin kaniadto.

Ang sunod nga pangutana, katuohan ba nga magbag-o na si Kerwin ug makigbatok na siya sa mga tigpayuhot og ilegal nga drugas kon modaog siya nga mayor?

Kon ako ang pangutan-on, moingon ko nga mahimong katoohan ug mahimo usab nga dili. Ang usa ka tawo mahimo man nga magbag-o sa iyang kinabuhi, ilabi na nga nakita niya nga way kaayohan nga nakuha niya pagsalmot sa negosyo sa drugas.

Aw, nakwartahan gyud hinoon si Kerwin, kay unsa ra gud na siya kaniadto sa wa pa mosu’d sa negosyo sa pagpamaligya og shabu. Diha sa siya kaniadto magpuyo sa Barangay Hipodromo, Cebu City ug pobre.

Nakapundo siya’g kwarta dihang misu’d na siya sa negosyo sa pagpamaligya’g shabu. Ang usa ka amahan nga naglantaw nga mapadako niya ug kahatagan og kabulahanan ang iyang anak inigka dako, dili malipay nga magtan-aw nga wa makab-ot sa iyang anak ang iyang gipangandoy kay nagumon kini sa shabu.

Kining mga tawhana, sigurado ko nga naglungot-lungot kini sila ug nangandoy nga makabawos kang Kerwin, Posible sab nga dunay kalabotan ang politika sa maong pagtinguha pagpatay kang Kerwin.

Mao nga angay’ng ayuhon gyud kini sa kapolisan sa pag-imbestigar.