Dili mabulokon nga talan-awon

Miawhag ang Trabaho party-list, pinaaagi sa ilang tigpamaba nga si Mitchell-David Espiritu, nga palapdan pa sa kagamhanan ang mga programa sa disaster preparedness aron maseguro nga luwas ang mga trabahante kon ugaling adunay makusog nga linog nga motay-og sa nasud human makasinati ang nasud sa Thailand ug Myanmar og usa ka makusog nga linog ni’ng bag-o lang.  Tinuod nga ang pagpangandam maoy labing epektibong paagi pagsagubang sa mga katalagman.  Kay ginaingon man nga nga “Ang pagpangandam sa katalagman usa ka matang sa pagkinabuhi, ug dili usa lamang ka dinalian ug mabulokon nga talan-awon.”  Muleeng!

Magsiga ang mata

Mihatag og direktiba si Presidente Ferdinand Marcos, Jr., ngadto sa tanang law enforcement agencies nga “kinahanglan dili matulog” karon panahon sa semana santa aron maseguro nga luwas ang publiko sa mga dautan’g elemento nianang mga adlawa.  Bisan sa kabala-an sa maong mga adlaw, gituohan gihapon nga adunay mga krimen nga mahitabo.  Apan tungod kay kina-iya man sa tawo ang mopahulay ug matulog, dili kalikayan nga adunay lahi nga pagsabot sa direktiba sa presidente.  Tungod ni’ng maong direktiba, mahisama na unya ang mga polis sa mga isda sa dagat nga “matulog nga magsiga ang mata.”  Madahaan!

Maestra na’y hulgaon

Mi-apelar si Senador Sherwin Gatchalian ngadto sa DepEd nga i-implementar na niini sa hingpit ang subject nga Good Manners and Right Conduct (GMRC) sa umaabot nga Academic Year 2025-2026.  Nagtoo ang senador nga ang subject nga GMRC makatabang sa pagtubag sa nagsaka nga kaso sa bullying sa mga tulonghaan. Gawas sa GMRC, mahinungdanon usab nga ilhon sa kagamhanan ang awtoridad ug katungod sa mga magtutudlo sa pagdisiplina sa mga estudyante isip ikaduha’ng ginikanan. Karong panahona, sagad sa mga tinun-an wala nay batasan ug mao na hinoo’y mohulga sa mga maestra nga labayon og “erase the board” o ba kaha, bitayon sa “flag ceremony.” Fezteleern!

Sad-an ang facebook?

Matud pa sa pipila ka mga kongesista, naglisod ang mga lokal nga awtoridad sa pagtubag sa mis-information ug ubang isyu sa social media tungod kay walay buhatan ang Facebook dinhi sa nasud nga nahimong babag sa ilang legal nga tulobagon.  Morag gipakasala na man hinoon sa mga kongresista ang Facebook sa mga fake news nga mikatap.  Matud pa sa akong amigo, “Tungod ba lang kay gigamit ang entablado sa pagbutyag sa ilang anomaliya, pakasad-on na diay dayon ang nagtukod sa entablado ingon man ang tig-gunit sa petromax.”  Atala lagee!

Bonus maoy gigarantiya

Wala pa’y kaseguroan kon kanus-a mahatag sa mga empleyado sa Cebu City Hall ang P35,000 nga Charter Day bonus kay gipaabot pa ang tubag sa Comelec kabahin sa gipangayo nga exemption sa election ban.  Malaumon hinoon si Cebu City Mayor Raymond Alvin Garcia nga mohatag na ang Comelec sa tubag karon semanaha.  Naghinam-hinam na gayod ang mga empleyado nga makadawat sa bonus.  Apan labaw’ng naghinamhinam ang mga loan sharks nga mabayran na sila sa ilang gipautang nga kwarta diin ang bonus maoy gigarantiya.”  Pagkatoytoy!