Prayoridad

Mora'g nagkasinabot silang Cebu City Mayor-elect Nestor Archival ug Mandaue City Mayor-elect Jonkie Ouano nga ilang hatagan og unang prayoridad ang pagsulbad sa seryosong problema sa pagpabaha kon magsugod na unya sila sa ilang pagpangatungdanan.

Matud ni Archival, nga usa ka engineer ug environmentalist, iyang na-review ang drainage master plan sa dakbayan sa Sugbo ug aduna nay pasiunang diskusyon uban sa mga departament head alang sa pagkab-ot og sulosyon sa maong problema.

Usa sa mga dinaliang aksiyon nga ipatuman ni Archival ang pagbutang og pumps aron paghabwa sa tubig gikan sa kanunay nga bahaan nga mga lugar sama sa Colon Street sa downtown area ug Barangay Tejero.

Sa laing bahin, si Ouano mipahayag nga makig-alayon siya sa nasyonal nga kagamhanan aron pagsiguro nga haom ang sistema sa drainage sa siyudad sa Mandaue sa plano sa Department of Public Works and Highways.

Saad ni Ouano nga ang iyang administrasyon maningkamot pagsulbad sa padayong problema sa pagbaha sa Mandaue, ilabina diha sa A.S. Fortuna Street ug Barangay Tipolo nga kasagarang lunopan panahon sa kusog nga ulan.

Insakto kining maong plano ni Archival ug Ouano paghatag og prayoridad sa nagkagrabeng problema sa pagbaha sa mga dakbayan sa Sugbo ug Mandaue paglingkod unya nila isip bag-ong local chief executives sa maong mga lugar.

Hagbay ra kining maong seryosong suliran sa pagbaha nga wala g'yud masulbad sa nanglabay nga mga administrasyon sa duha ka siyudad. Siguro daghan ang moingon nga mobutho lamang kini kun ting-ulan. Apan dako kini og epekto sa lokal nga ekonomiya.

Panahon na nga mohimo og konkretong solusyon ang mga lokal ug nasyonal nga kagamhanan batok niining dakong problema sa pagpabaha dili lamang sa mga dakbayan sa Sugbo ug Mandaue kondili sa tibuok nga Metro Cebu.