Di maayo mamentaha

Dili gyud maayo sa mga kandidato nga mamintaha sa kaatbang nilang kandidato kay basin hinuon og silotan sila sa mga botante ug dili na kamo nila botohan unya sa eleksyon.

Didto sa Argao, si Kongresista Edsel Galeos klaro kaayo nga maoy gireklamo ni Argao Mayor Allan Sesaldo nga kuno namolitika atol sa pagpanghatag og hinabang didto sa Barangay Usmad.

Sa suwat reklamo ni Mayor Sesaldo nga gipadala niya ngadto sa Commission on Elections, sa Department of Social Welfare and Development (DSWD) ug sa Ombudsman, wa niya ilha si Galeos.

Apan ang Public Information Office (PIO) sa Argao mitataw nga si Kongresista Galeos maoy gipasabot sa mayor, kay giingon man nga kongresista sa second district sa Sugbo.

Si Galeos maoy incumbent nga kongresista sa second district ug giatbangan siya pagdagan ni Vice Governor Junjun Davide nga wa na magpapili pagbalik isip ikaduhang labing dakong opisyal sa probinsya.

Ambot unsa kahay itubag niini ni Galeos kay wa man dayon siya makontak. Aw, lisud gyud hinuon kini ikalimod. Si Davide hinoon igo ra man nga mikatawa ug mibaliwa ra niining maong isyu.

Apan ang DSWD ug Comelec mibaod gyud sa mga kandidato nga dili mopahimu’s sa higayon nga mangampanya atol sa pagpanghatag og mga hinabang sa mga pobre nga lumolupyo.

Bisan dinhi sa Cebu City, dunay mga politiko nga bentahoso kaayo kay mangampanya atol sa pagpanghatag og mga hinabang. Sus, kini ra ba nga usa ka kandidato pagka konsehal, nagpagawas ra ba og survey nga hinimo-himo ra nga siya kuno ang Number 1.

Ang tinuod, maayo gani og makalusot nga daghang kandidato nga mas ilado pa kay kaniya. Di man gani makamao manulti sa kampanya, unsa pa kaha kon mag-sesyon na kay konsehal man ang gidaganan niya.

* * *

Nalipay ko nga nagtan-aw nga dunay mga dapit nga sa wa pa magsugod ang political campaign period sa mga kandidato, nabulit kini sa mga propaganda sa mga midagan sa eleksiyon.

Apan karon ang mga kawayan ug kahoy na lang nga gipapitlan maoy nahibilin kay gipanangtang kini sa mga sakop sa Comelec, kapolisan ug kawani sa Cebu City government.

Ang ipabilin ug dili panangtangon kadto ra nga mga propaganda materials ang anaa gibutang sa gitawag og common posters area. Nagkaduol na ang eleksyon ug angay’ng paspasan pa sa joint task force ang paghimo og kampanya batok sa mga malapason sa balaod.

Kay kon tugotan gud nga ang mga kandidato nga kwartahan daghan kaayo og mga propaganda nga gipakatap sa lainlaing dapit, alkanse intawon kadtong mga pobre apan utokan pa kay kanila.