Kinopya

Human sa tulo ka tuig nga pagpinaabot moabot na gyud ang tag P20 nga kilo sa bugas. Apan dili tanan makapahimulos niini, atong klarohon kay basin baya og magdahum kita nga para kini sa tanan sanglit atol sa pagsaad kaniadto ni Presidente Ferdinand Marcos Jr. dihang nilansad pa siya atol sa kampanya wala man siya moingon nga limited ang programa.

Bitaw bisan og limitado kini, angayan gihapon natong hangpon kay nahatagan man og katumanan, partial lang hinuon. Ang pangutana nganong karon lang? Tungod ba kay hapit na ang eleksyon? Ang iyang tubag mao usab ang akong tubag.

Pero klarohon lang nako nga ang programa sa pagpabarato og bugas nahimo na kini sa Cebu provincial government niadto pang tuig 2023 diin nigahin ang Kapitolyo og multimillion pesos nga ipalit og bugas ngadto sa National Food Authority kon NFA.

Maayo baya kaayo ang programa kay nakatabang gyud sa mga nagkinahanglan bisan og dunay lagda nga gipatuman diin kadtong mga kabos lang gyud ang mahatagan. Subo nga palandungon nga wala mapadayon kay wala naman sila hatagi sa NFA ug supply sa bugas, aw walay mahimo ang kagamhanang probinsyal.

Kining programa karon sa Department of Agriculture gikopya lang nila sa lalawigan sa Sugbo Merkado Barato nga programa sa lalawigan sa Sugbo. Mao kini ang tinuod kay mao man gyud ang pamaagi o template nga gi-apply nila. Ang tulo ka rehiyon sa Visayas ang pilot area sa P20 program nga naglakip sa Central, Eastern ug Western VIsayas ug syempre apil ang lalawigan sa Sugbo.

Angayan nga mobati og garbo ang Sugbo kay mao man ang nakahunahuna niini kaniadto dihang gihatagan og katumanan ni Governor Gwen Garcia ang saad sa presidente nga wala matuman. In fairness sa gobernador, wala niya i-claim ang credit for delicadeza seguro. Regardless kong kinsa ang nag-initiate niining programa, ang importante mahatagan na og katumanan ang dugay nang gipaabot tag 20 pesos nga kilo sa bugas nga murag damgo kaniadto nga inig mata wala diay.

Masustinehan kaha ni nga programa kay dili baya tanan covered sa national government sanglit gikinahanglan nga adunay counterpart ang mga LGU nga gahin sa pagpalit sa bugas gikan sa ilang supplier. Mao bitaw nga ang mga nahaunang mga LGU ang pilot area kay maoy naka-commit nga mohatag og counterpart. In other words, ang mga LGU nga kwartahan ang maka-avail niini, kadtong mga pobre waley.

Gitinguha sa kagamhanan nga molungtad kini hangtud sa tuig 2028. Libre man ang mangandoy aw pangandoyon nato kini hangtud mahatagan og katuman kay basin diay matinuod pud. Bitaw karon nga naa na kining baratong bugas ato usab kining hangpon bisan katunga lang gyud at least mapahimuslan kini sa mga mas nagkinahanglan.