Editoryal — LGUs magpakita ng tapang sa POGOs

Narito pa sa bansa ang mga salot na Philippine Offshore Gaming Operators (POGOs) at patuloy na naghahatid ng problema. Hindi natupad ang sinabi ng pamahalaan na pagsapit ng Enero 1, 2025 ay POGO-free na ang bansa. Kabaliktaran ang nangyari sapagkat muling bumuo ng grupo ang mga dating nagpapatakbo sa POGO at nagpatuloy sa masamang gawain. Mas naging mabangis pa ngayon ang mga illegal POGO na para bang may padrino sila.

Lubhang nakapagtataka kung paano nakakapag-setup nang walang kahirap-hirap ang illegal POGOs sa mga lungsod sa Metro Manila. Napakabilis nilang gumawa ng illegal na walang pinagkaiba sa dati na nilang pinatatakbo.

Sa kasalukuyan, pinakapaboritong lugar ng illegal POGOs ang Pasay City at Parañaque City. Mula Enero 2025 hanggang sa kasalukuyan, napakarami nang POGO hubs ang sinalakay ng PAOCC sa dalawang lungsod.

Noong Sabado (Marso 15), 49 na dayuhan ang inaresto ng Bureau of Immigration at National Bureau of Investigation sa isang gusali sa Macapagal Ave., Pasay City.

Noong Pebrero 22, mahigit 400 POGO workers na kinabibilangan ng mga Pinoy, Chinese, Vietnamese, Indonesian at Malaysian ang inaresto sa Parañaque City.

Nakikita ang kapabayaan ng dalawang lungsod kaya naglipana ang POGOs. Hindi ba nila maaaring pagsikapan na lipulin ang POGO sa kani­lang nasasakupan? O mas nasisilaw sila sa salapi na kinikita kaya hinahayaan ang POGOs? Magpakita ng tapang ang LGUs sa POGOs.