Gustong ipausab ang nationality sa birth certificate

Dear Atty. Divine,

Duna ko’y pangutana labot sa akong birth certificate. Ang nabutang man gud nga nationality sa akong birth certificate kay Chinese. Ang akong papa Chinese apan ang akong mama Filipino. Ug dinhi ko sa Pilipinas natawo ug wa gani ko maka-adto og China. Nagplano unta ko nga mokuha og passport apan tungod sa akong Nationality dili ko makakuha og passport sa Pilipinas. Gusto unta nako nga ipausab ang akong nationality sa akong birth certificate from Chinese ngadto na sa Filipino, unsay angayan nako nga buhaton? -- Andrew

* * *

Dear Andrew,

Ang pag-usab sa nationality sa entry sa imong birth certificate moagi gyud kini sa Korte. Kinahanglan ka nga mopasaka og Petition sa Korte sa lugar diin ka marehistro alang sa pag-usab sa entry sa nationality sa imong birth certificate from Chinese to Filipino. Kinahanglan nga imong probahan sa korte nga Filipino ang imong inahan pinaagi sa pagpresentar usab sa birth certificate sa imong inahan o sa iyang Philippine Passport. Imong ilakip sa pagbutang sa imong petition nga imong gipili ang nationality sa imong inahan nga usa ka Filipino. Kinahanglan nga mokuha ka og abogado nga maoy mo-prepare ug mopasaka sa imong petition ngadto sa Korte. Kun ma-aprobahan sa korte ang imong petition then mamahimo nang imong ipausab ang imong nationality sa imong birth certificate. Thank you and God bless. -- Atty. Divine

Alang sa inyong pangutana, palihug lang sa pag email sa flores_divina@yahoo.com ug akong tubagon ang inyong pangutana pinaagi sa akong column matag Miyerkules, Sabado ug Domingo.