Fake news midagsang

Daghang polis ug militar nga nakabenepisyo pagpausbaw sa ilang sweldo tungod ni kanhi Presidente Rodrigo Duterte, naluoy gyud sa nahitabo nga pagdakop ni Digong ug gidala kini sa The Hague, sa Netherlands aron paatubangon sa International Criminal Court.

Pero dili sab ko motuo sa giingon nga dunay mga polis ug militar nga mi-resign sa ilang katungdanan tungod kay nasuko nga si Presidente Bongbong Marcos wa mobabag aron dili dakpon sa International Police (Interpol) si Duterte.

Kon dili ta magmatngon, magamit ta sa mga tawo nga gusto lang mopakaylap og mga fake news. Sensitibo kaayo kining isyu nga pagdakop kang Duterte, ug nakita nako nga ang mga tawo nga nangumentaryo niini, nagpadala na sa ilang gibati.

Daghan ang mikwestyon kon nganong makagukod pa man ang International Criminal Court kang Duterte nga ang Pilipinas kuno mibuwag na man sa ICC? Tungod niini, daghan na kaayong yawyaw ug wa na sila magsusi-susi aron matubag ang ilang kalibog.

Ang tinuod, ang mga kaso nga giingong kalapasan sa balaod nga nahimo ni Duterte, wa na iapil kadtong mga nanghitabo human nga ang Pilipinas wa na magpasakop sa ICC lapas kaniadtong 2019. Ang mga extra-judicial killings nahitabo 2011 ngadto sa 2019.

Sa ato pa, mayor pa si Duterte sa Davao City nga giingong miuso didto ang Davao Death Squad ug hangtud nga si Duterte nahimong presidente sa nasud kaniadtong June 30, 2016.

Usbon nako, wa ko’y pagsupak nga nangamatay ang mga banggiitang drug lords atol sa termino ni Duterte kay lagi misukol man kuno sa mga polis.

Wa malilong kanato nga dihang presidente pa si Duterte gibalikbalik niya ang pag-ingon nga dili magpanuko ang mga polis sa pagpatay sa mga druglords kon mosukol.

Gani atol sa Senate Inquiry nga giimbitar si Duterte kay nagtuki man kini sa extrajudicial killings, giangkon sab niya nga siya mismo nakapatay og tawo, apan wa niya ilha kinsa ang iyang napatay ug kon nganong iyang gipatay.

Si Presidente Marcos miingon nga dili siya makabalibad sa hangyo sa Interpol nga magpatabang pagdakop ni Duterte kay ang Pilipinas nagpatabang man sab sa Interpol pagdakop sa mga wanted dinhi nga didto nanago sa laing nasud.

Pero si kanhi Mayor Michael Rama nga gikuhaan og pamahayag bahin niini, miingon “bulsh_t.” May miingon nga 80 ka tawo ang pangdakpon dinhi sa nasud kay may kalambigitan sila sa extrajudicial killings, ug sigurado ko nga usa kanila si kanhi PNP Chief ug karon Senador Bato dela Rosa.

Unta, ang nahitabo ni Duterte dili lang mosangpot og laing kaguliyang sa tibuok nasud sa umaabot nga mga adlaw.