Mibundak ang ulan ug mibaha

Ingon niini gyud atong kanunay masinatian kada ting ulan ilabi na sa Metro Cebu area sama nalang sa nahitabo niadtong adlaw'ng Biyernes nga natanggong ang mga motorista kay lawom naman ang mga karsada tungod sa baha dihang walay hunong nga pagbundak sa ulan subay usab sa nasinating low pressure area kon LPA. Apil ko sa nahasol dihang miuli na ko gikan sa trabahoan sa dakbayan sa Sugbo padung sa dakbayan sa Lapu-Lapu.

Sa Mandaue City unta ko moagi kay nagdahum ko nga gamay ra ang sakyanan kay holiday man. Apan wala ko kadayon kay nahimo namang sapa ang mga karsada tungod sa baha busa nibalik ko sa agi. Pero nagbaha man usab ang pipila ka mga agianan sa Cebu City ug ayha ko makalabang padung sa CCLEX kinahanglan ko moagi sa MJ Cuenco pero naa puy tubig. Niagi ko downtown naa gihapoy tubig pero dili kaayo lawom hangtud nakaabot ko sa SRP dayon u- turn sa SM Seaside padung sa CCLEX.

Sa dakbayan sa Lapu-Lapu usab dunay mga karsada nga gibahaan labi na sa mga interior portion maong nituyok na sad ko sa mga agianan nga walay tubig hangtud nakaabot sa balay. Pastilan pagkataas sa akong biyahe niadtong Biernes tungod sa perwisyo sa baha, moingon ang uban nga motunga ra man ang baha kong moulan tinuod kay dili man magpakabana ang mga tawo sa pagpangandam kong panahon sa ting init. Ayha ra molihok kong ting ulan na.

Kining problemaha wala gyuy kasulbaran sukad pa kaniadto. Duna nay mga proyekto nga gigastohan og binilyon ka pesos pero wala man gihapon mosaler, nahulog sa wala gihapoy kapuslanan kay ang kwarta nga gigamit niini murag gianod ra man gihapon sa baha kon mo ulan.  Kapila na nagdeklarar og gubat batok sa baha ang Cebu City apan wala gihapoy nahimo batok sa kinaiyahan, ingon usab niini ang Mandaue ug Lapu-Lapu City abi nato kong ok na pero ini'g bundak sa ulan mobaha ra man gihapon.

Wala gyud mahigmata ang mga tawo kay padayon man usab sa pagbalewala sa suliran sa basura kay magpataka ra man og labay bisay asa nga mobara sa mga agianan sa tubig. Dili mahimo nga isalig nalang tanan sa kagamhanan ang pagsulbad sa problema kon dili kita mismo ang unang magpakabana alang sa kasolbaran sa atong problema sa baha.

Sa bag-ong administrasyon nga molingkod sa katungdanan unta mahatagan na kini og malungtaron nga kasolbaran dili lang kutob sa baba ug band aid nga solusyon. Igo lang gyud kita sa panghinaut niini basin nalang mahatagan kini og katumanan.