EDITORYAL - Hinay-hinay lang

Kaning kasikas sa politika dinhi sa Pilipinas nga nakapabahin-bahin sa mga Pilipino gipanid-an ni karon og maayo sa mga ekonomista ug ilabi na sa mga negosyante nga nagnegosyo na dinhi ug sa mga nagplano palang mamuhonan dinhi.

Ang mga negosyante nga naa na karon namuhonan dinhi ilabi na ang mga langyaw nga mga kompanya nag-obserbar karon sa dagan sa political stability sa nasud.

Tungod sa kagubot, kung duna man silay mga planong expansions ug pagpalapad sa ilang operasyon dinhi, tingali gipangkanselar lang una, kay tingali og mausik lang ang milyones dolyares nilang puhonan kun magkagubot.

Usa sa mga ehemplo aning mga kompanyaha nga dunay daghang nanarbahong Pilipino kining mga Business Process Outsourcing  (BPO) diin nanarbaho kining mga call center agents.

Ang kadaghanan mga kompanyang giserbisyohan aning mga BPOs dinhi nagbase didto sa abroad.

Apil sa mga nagsalig niining mga kompanyaha ang mga estudyante nga nanarbaho para sa ilang pamilya ug sa pagtiwas sa ilang pag-eskuyla sa kolehiyo.

Mga estudyanteng dili kayang mapaeskuyla sa ilang mga ginikanan mao nga naningkamot silang paeskuylahon ilang kaugalingon.

Kun pananglitan tungod sa kagubot maapektahan ang operasyon sa mga BPOs, ang mga kompanya didto sa abroad nga nagkuha sa ilang serbisyo mangita og laing BPO nga dili sa Pilipinas sama sa India, Malaysia, Indonesia ug uban pang dunay political stability.

Sa pikas bahin, mao sab kini unya ang mamahimong hinungdan nga ang ubang mga kompanya didto sa abroad nga nagplanong magnegosyo dinhi, mahadlok na unyang mosugal kay basin maalkanse pa hinuon.

Busa, maghinay-hinay lang unta ug dili magpalabi ang katawhang Pilipino bahin aning kasikas sa mga politiko, kay ang mga yanong tawo maoy numero unong maapektahan, samtang ang mga protagonistang politiko, mga adunahan ng daan ug dili magutom ilang pamilya.