Pagka salawayon

Tungod kay dagko lagi kuno ang makwarta kon magsige ka’g post og lainlaing content sa Facebook, daghan karon ang bisan unsa na lang ang nahunahunaan.

Tiaw mo nga dunay usa ka tawo nga nagsul-ob og costume nga mora’g takdong, kun snail, unya nagkamang kunohay sa karsada didto sa lungsod sa Consolacion.

Tungod sa gihimo sa maong tawo, nabalda ang pagbiyahe sa mga sakyanan kay diha man siya nagkamang-kamang sa karsada nga agianan sa mga sakyanan.

Dunay miingon nga kaanugon kuno nga wa madam-agi sa sakyanan ang maong tawo, ug nakaingon ko nga kon nahitabo pa kini, siya ra gyud ang mabasol.

Nindot ang lakang sa PNP Highway Patrol Group (HPG) nga ipatawag nila ang maong tawo aron sukit-sukiton kabahin sa iyang gihimo, ug hayan himoan kini nila og legal action.

Tinuod, makaiibog ang dakong kwarta sa paghimo og mga contents diha sa Facebook, apan dili unta sila mohimo og mga sama sa gihimo niadtong nagkamang-kamang sa karsada sa Consolacion.

* * *

Kon ang gihimo ni magpapatigayon Chester Cokaliong himoon usab sa ubang mga adunahang negosyante, daghan gyud ang mabulahan ug makapahimu’s sa ilang pagtabang.

Bag-o pa gani kadto nga gipanindot sa Cokaliong Foundation ang gym sa Tejero Elementary School, karon ang gym na usab sa Tisa Elementary School maoy gigastohan ni Chester sa kaugalingon nilang kwarta.

Gawas sa maong mga tunghaan, daghan pa nga mga eskwelahan ang gitan-aw karon nga tabangan ni Chester, ilabi na kadtong mga makalolooy kaayo nga hangtud karon wa pa mapaayo gikan sa bagyong Odette.

Angay usab nga pasalamatan nato si Konsehal Philip Zafra kay siya maoy mitawag ni Chester aron ang Tisa Elementary School gym maoy iyang hatagan og kaharohay.

Sanglit amigo man kaayo ni Konsehal Zafra si Chester, ang negosyante nga tag-iya og mga barko nga ubos sa Cokaliong Shipping Lines ug mga hotel, wa gyud magmakuli pagtabang.

Aw, hinoon, kini si Cokaliong makadaghan na kini pasidunggi sa kagamhanan sa Dakbayan sa Sugbo tungod sa iyang pagka matinabangon sa mga programa sa siyudad.

Unta, ang sama ni Chester nga buotan, ug gani duna siya’y mga scholars nga gipatungha ug daghan na ang nakahuman sa ilang pag-eskwela, manakod unta sa ubang mga adunahang magpapatigayon.

Matud ni Chester, ang iyang mga empliyado sa mga barko niya kon makaabot na sila’y napulo ka tuig sa pagpanerbisyo, pwede na niya kining hatagan og pribileheyo nga patunghaon niya isip scholar sa college ang usa niya ka anak.

 Tungod niini, daghan na ang nakahuman sa pagtungha sa mga anak sa iyang mga empliyado nga gihimong scholar ni Chester Cokaliong.