U.S. sandigan pa ba ng demokrasya?
Noong 1949, itinatag ng United States, Canada at ilang kanluraning bansa ang North Atlantic Treaty Organization (NATO) na naglalayong pigilin ang mga digmaang pandaigdig.
Kinilala at nirespeto ng ibang bansa ang U.S. bilang tagapagtanggol ng kalayaan at demokrasya. Malaking bahagi ng pananalapi nito ay inilalaan bilang ayuda sa mga maliliit na bansa gaya ng Pilipinas upang palakasin ang larangan ng depensa.
Nagpapadala pa ng mga sundalo ang U.S. upang tumulong sa mga kawal ng maliliit na bansa sa panahon ng digmaan. Kaya nga ang Pilipinas ay may Mutual Defense Treaty sa U.S.
Pero sa bagong pamamahala ni Presidente Donald Trump ipinasya niyang magtipid at ang unang binawasan ay ang tinatalakay kong ayuda sa ibang bansa. Kung tutulong man ang U.S. sa iba, dapat may kapalit.
Transactional President si Trump. Nais niya na kung magbibigay ito ng ayuda ay may kapalit ding benepisyo sa kapakinabangan ng U.S. Napabalita na ang Russia na dating kaaway na mortal ng U.S. ay nag-alok nang malaking supply ng aluminum sa U.S. Ang Rusya, sa pamamahala ng diktador na si Vladimir Putin ay kasalukuyang sinasalakay at sinasakop ang Ukraine. Kaya napapatanong ang ilan:
Ang magandang offer ba ni Putin kay Trump ang dahilan kung bakit “binastos” ang Presidente ng Ukraine na si Volodymir Zelenskyy nang ito’y magtungo sa Oval Office upang humingi ng saklolo kay Trump. Iyan ang naging pangit na impression ng mundo kay Trump.
Malaki ang impact ng pangyayaring ito sa mundo. Ang polisiya ng U.S. ay magbibingit sa nasabing bansa na kumalas sa NATO na U.S. din naman ang nagtatag. Kung mangyayari iyan, nanganganib ang daigdig sa isang global war. Inamin mismo ng NATO na hindi nito magagampanan ang layunin nito kung wala ang U.S.
- Latest
