Habang bumubulusok ang missile, Sen. Raffy kumilos

Sa gitna ng putukan at palitan ng mga ballistic missile sa pa­gitan ng Israel at Iran, isang boses ng tapang at pagkilos agad ang umalingawngaw para sa ating mga kababayan: si Senador Raffy Tulfo. Habang ang iba’y nag-aabang pa ng press release o nagpapaligsahan sa grandstanding, si Tulfo ay walang sinayang na oras—tumawag, kumilos, at nagpa­tawag ng mga ahensya para sa mabilisang aksyon.

Hindi ito scripted. Hindi ito drama. Ito ang uri ng lider na ipi­­naglalaban ng taumbayan—prangka, mabilis, walang paliguy-ligoy, at may tunay na malasakit. Hindi siya naghintay ng camera bago umaksyon.

Habang ang ilan ay nagpapanggap na may pakialam, si Tulfo ay tunay na nag-aalala sa kapakanan ng 31,000 Pilipinong nasa Israel at 2,000 sa Iran, karamihan sa kanila’y mga caregiver at manggagawang naghahanapbuhay para sa kanilang mga pamilya sa Pilipinas.

Ang pagsabog ng giyera ay hindi biro, at hindi dapat gami­ting entablado ng propaganda. Kaya’t nararapat lang na kilalanin ang tuluy-tuloy na pagkilos ni Tulfo bilang ehemplo ng dapat tularan sa serbisyo publiko.

Tumawag siya sa DFA, DMW, at mismong mga embahador —hindi para magpa-picture kundi para matiyak na ligtas ang ating mga OFW, lalo na yaong mga nasugatan at nawalan ng tirahan.

Ang kanyang panawagan para sa “united and concerted efforts” ay hindi pahayag lang sa media kundi konkretong babala: Maghanda tayo sa pinakamasahol, dahil buhay ng Pilipino ang nakataya.

Hindi ito panahon ng alanganin; ito’y panahon ng mabilisang aksyon. Kaya’t ang kanyang pagpupursige na matukoy ang lahat ng Pinoy sa war zones, kabilang ang undocu­mented workers, ay isang matalas at makatarungang pana­wagan sa gobyerno.

Muli, pinatunayan ni Tulfo kung bakit siya tinatawag na “Idol” ng masa—hindi dahil sa pa-cute o pa-ingay, kundi dahil sa kanyang galaw-agad na liderato. Sa panahong parang wala nang masasandalan ang OFW kundi sarili nilang lakas ng loob, si Tulfo ang nagmistulang sandata at sandigan nila.

Sa giyera ng mga bansa ng banyaga, si Tulfo ang sundalong Pilipino sa senado—sumusugod para sa kapayapaan at kaligtasan ng ating mga bayan sa ibayong dagat.