Mas dakong mananaog
Si Bise Presidente Sara Duterte ug iyang dinastiya ang labing nakapabor sa paglangay ni Senate President Chiz Escudero sa impeachment trial. Kon madayon ang binuang nga kalendaryo ni Escudero nga sa Hulyo 30 sugdan ang husay, makaangkon ang mga Duterte ug lima ka buwan nga lugway sa pagmaniobra aron mabasura ang impeachment sa Korte Suprema.
Apil sa maniobra nga ilang mahimo mao ang pagpaningil ni kanhi Presidente Rodrigo Duterte sa utang kabubut-on sa mga mahistrado nga iyang gitudlo. Labi na sa mga mahistradong nanghangyo niya aron makalingkod sa kinatas-ang korte.
* * *
Kon gisugdan pa lang unta dayon ang husay, pinasubay sa tinuod nga kahulogan sa “forthwith” nga gisugo sa 1987 Constitution, dili kabuylo ang mga alyado ni Duterte sa labawng hukmanan.
Kay dili silang kapahunong sa husay. Gawas lang kon dunay klarong ebidensiya sa pangabuso sa House of Representatives ug sa Senado. Ang duha ka buwan nga pagyaka sa mga kongresista sa impeachment complaints dili timaan sa panglaktod. Ang pag-insistir sa mga senador sa pagbakasyon imbes manumpa isip senator judges dili sukaranan sa pagpasangil nga ilang giapiki ang bise presidente.
* * *
Laing bentaha sa mga Duterte mao ang kalangay sa pagpakita sa mga ebidensiya nga mahimong makaguba sa ilang ambisyon nga makabalik sa
Malakanyang:
Unsaon nila pagpasabot nganong silang Mary Grace Piattos, Kokoy Villamin ug laing kapin sa 1,300 ka dili tinuod nga mga tawo ang nakadawat sa confidential funds sa Office of the Vice President (OVP) ug Department of
Education (DepEd)?; ug
Unsaon nila pagtubag kon mapamatud-an nga binilyon ka pesos ang nagsulod-gawas sa joint bank account sa amahan nga kanhi presidente ug sa anak nga bise presidente?
* * *
Dili anghel si Escudero nga dili mangayo og baylo sa iyang tabang sa mga Duterte. Iyang ka-ambisyuso mahimong nakaaghat niya pagdemanda og promosyon sa 2028. Mahimong apil sa iyang pasalig nga gawas nga langayon ang husay absuweltuhon pa gyong bise presidente.
Dili taphaw si Escudeo nga dili makaamgo kinsay mas dakong mananaog kon makabalik ang mga Duterte sa palasyo. Makabuylo nang China sa pag-ilog sa West Philippine Sea. Ug tungod sa iyang amot sa kawsa, mahimong masaligon si Escudero sa mas dako pa gyong premyo.
* * *
- Latest
