12 ka andana nga school building tukoron na karong tuiga
CEBU, Philippines — Tukuron na ang labing una nga 12 ka andana nga pampubliko nga school building sa tibuok Pilipinas nga mahimutang diha sa Don Vicente Rama Memorial National High School sa Barangay Basak San Nicolas sa Dakbayan sa Sugbo.
Gitawag kini ni Congressman Edu Rama og flagship project sa Department of Education-7.
Si Cong. Rama usab ang nangamahan sa maong kalambuan alang sa edukasyon sa habagatang distrito sa Sugbo.
Gibana-bana nga anaa sa 5000 ka mga tinun-an ang makagamit niini kung mahuman ang maong edipisyo.
Butangan kini og elevator ug mga maayong ekipo alang sa laboratoryo.
Gikatakda nga sugdan kini og tukod karong tuiga kun diin gibubuan kini og dili momenos P700 million nga pundo gikan sa nasudnong kagamhanan.
Gitug-an ni Cong.Rama nga aduna gyuy kakuwang sa mga classrooms alang sa mga tinun-an sa siyudad.
Giklaro usab niya nga nakapasar sa land requirement ang Barangay Basak San Nicolas hinungdan nga nakahukom ang DepEd-7 nga adto tukoron ang maong school building. — /MEL (BANAT NEWS)
- Latest
