Dako'g gasto, way ayo?

Gisaway ni kanhi Tourism Secretary Ace Durano ang mga flagship tourism programs ni outgoing Cebu Governor Gwen Garcia nga mao ang Pasigarbo sa Sugbo ug ang Suroy-Suroy Sugbo kay naglabin lang kuno niini ang pagpa-promote sa mga personalidad ug dili sa turismo. Dili tiaw ang gasto sa probinsiya aron mapahigayon kini’ng maong mga programa apan walay tataw nga kaayohan nga naani ang katawhan niini.  Komentaryo pa sa mga edaran, “Dako kaayo’g gasto sa sayaw-sayaw ug kaon-kaon apan ang mga hospital wala’y mga gamit.  Labon gipamalit pa na’ng kwartaha og Efficascent ug Vicks aron ipanghatag sa mga edaran, malipay pa mi.”  Fezteleern!

Igo ra’ng gipanamkon

Gihugon-hugon nga buot mohagit sa liderato sa Senado ang duha ka bag-ong napili nga senador nga si Imee Marcos ug Vicente Sotto III apan nabatyagan nga wala’y usa kanila nga may kasibot sa pagpahigayon sa impeachment proceedings sa bise presidente.  Ni’ng maong mga baruganan, nunot sa kamatuoran nga daghan ang mga senador nga dapig sa bise presidente, maingon nato nga dagtom ang kaugmaon sa impeachment proceedings.  Matud pa sa akong amigo, “Dili na mahimugso ang impeachment kay mao pa gani pagpanamkon, napunit man dayon.”  Madahaan!

Sulbad sa kakabos?

Gipahibalo ni Social Welfare Secretary Rex Gatchalian nga segun sa resulta sa survey nga gipahigayon sa Social Weather Station, adunay pagkunhod sa hunger incidence sa sektor sa mga “food poor” tungod sa gipahigayon sa ahensya nga “Walang Gutom” program.  Adunay nag-ingon nga dili malungtaron ang mga ayuda program sa kagamhanan kay gawas nga nagdasig kini sa katapolan, dako usab ang atong budget deficit ingon man ang atong utang.  Mao kana’y giingon nga, “Sa paghatag og ayuda isip sulbad sa kagamhanan sa kakabos sa katawhan, nahisama ra og nag-ayo kini’g guba nga sakyanan ginamit lang ang taya-on nga llave-tubo.”  Fishkots!

Nahurot og panukli

Namahayag si Cebu City Mayor-elect Nestor Archival nga dili molahutay ang kasamtangan’g operational model sa MCWD, diin mopalit kini og bulk water supply sa kantidad nga P65 matag metro cubico ug ibaligya ngadto sa mga konsumidor sa tag-P28 lamang, nga mamahimo unya’ng hinungdan sa pagka-bangkarota sa MCWD.   Dakong baligho tinuod kining gibuhat sa management sa MCWD kay inay moginansya, alkansi na man hinoon bisan daghan og halin.  Makapahinumdum sa tindera nga sa dihang gipangutana sa tag-iya kon asa ra ang halin sa ilang tinda kay nahurot man, yano ra’ng mitubag nga, “Nahurot man og panukli, Sir.”  Pagkatoytoy! 

Dili mangayo’g diskwento

Gipahinumduman sa LTFRB ang tanan’g mga public utility drivers ug operators sa balaod nga nagmando sa paghatag og 20% nga diskwento sa pamasahe labi na kay nagsingabot nga ang pagbukas sa klase karong Hunyo 16 uban ang pahimangno nga adunay silot kadtong dili motuman.  Dakong tabang dili lang sa mga estudyante kon dili lakip na sa mga ginikanan kining maong diskwento.  Apan komento pa sa ubang driver, “Motuman man mi sa balaod apan ang uban estudyante kay dili man mangayo’g diskwento, alangan imo pugson.”  Muleeng!