Seniority angay’ng sundon

Daghan sa mga supporters ni kanhi presidente Rodrigo Duterte ang misaway sa pagtudlo ni Presidente Ferdinand Marcos, Jr. ni General Nicolas Torre III isip bag-ong hepe sa kapolisan sa nasud. Usa sa mga mikwestiyon sa pagkatudlo ni Torre mao ang anak sa kanhi presidente nga si Davao City Mayor Baste Duterte. Alang ni Mayor Baste, dili si Torre maoy labing qualified sa mga kandidato pagka chief PNP sanglit two-star general lang siya ug dunay mas taas pa niya og ranggo.

Ang ubang dumadapig sa mga Duterte mihulagway ni Torre nga sipsip sa administrasyong Marcos busa gipremyohan sa iyang pagdakop sa kanhi presidente ug paghatod niini didto sa The Hague aron atubangon ang iyang kaso atubangan sa International Criminal Court.

Duna say mga mipadayag og kahingawa nga modaghan ang mga kaso sa paglapas sa tawhanong katungod ubos sa pamunoan ni Torre sa PNP. Apan alang nako sayo pa aron hukman ang iyang liderato sa PNP.

Tinuod nga bisan asang angulo nimo tan-awon maisip gyud nga premyo ang pagkatudlo ni Torre sa pwesto tungod sa iyang dakong papel pagdakop kang kanhi presidente Duterte, apan wala ni makausab sa kamatuoran nga qualified siya sa pwesto.

Tinuod nga dunay mas tag-as niya og ranggo nga angayan untang maoy gipili aron mangulo sa PNP apan way klarong lagda nga gisubay ang pagpili og chief PNP. Mas bug-at ang “trust and confidence” gikan sa presidente aron ka matudlo sa pwesto, butang nga nakabintaha  si Torre kay sa ubang mga kandidato.

Ug husto si Torre sa iyang pamahayag nga way katungod si Mayor Baste nga manulisok ug moreklamo sa iyang pagkatudlo tungod kay ang iyang amahan mao say gihimo kaniadto dihang iyang gitudlo si kanhi chief PNP ug karon Senador Ronald “Bato” dela Rosa.

Dihang gitudlo ni Duterte si dela Rosa isip chief PNP, Brigadier General ray iyang ranngo ug dunay mas daghang mas senior pa kay niya ang iyang gilaktawan. Sa hilom nakamugna ni sigurado og demoralisasyon sa mga opisyal sa kapolisan, apan tungod kay ang PNP usa ka professional nga organisasyon ilang gidawat ang sakit nga kamatuoran nga way makabuot sa presidente kinsay iyang saligan.

Nahitabo sab ni kaniadto panahon ni kanhi presidente Joseph Estrada dihang iyang gitudlo nga chief PNP si kanhi heneral ug karon Senador-elect Panfilo Lacson. Junior sab kaayo si Lacson niadtong higayon dihang gipili siya ni Estrada nga mangulo sa PNP.

Hangtud nga way klarong lagda nga subayon pagtudlo og hepe sa kapolisan, sigurado nga si Torre dili maoy katapusan nga opisyal nga manglaktaw sa iyang mga labaw. Aron malikayan ang ingon niining sitwasyon ug ang demoralisasyon sa PNP organization, angayang himoon nga istrikto lagda ang pagtamod sa seniority pagtudlo og pangulo sa kapolisan ug sa bisan asang ahensiya sa gobiyerno.