Kinsay ituboy sa PFP?

Ang paghiusa sa Kugi, Uswag Sugbo (KUSUG) ug Partido Panaghiusa, maoy nagsilyo sa tandem nilang acting Mayor Raymond Alvin Garcia ug ni kanhi MCWD chairman Joey Daluz III. Ang dugay na’ng gihugon-hugon nga panagkuyog sa duha ka grupo sa umaabot 2025 midterm elections hingpit nga gikumpirmar ni Daluz sa miaging Lunes dungan sa ilang opisyal nga pagpahibawo sa merger sa ilang mga partido.

Bisan wa pa ang opisyal nga pahibawo, diha nay mga tabi-tabi nga magkuyog ang duha tungod sa daghang mga higayon nga sila nakit-an nga nagtigom. Dili pud hinuon ni katingad-an tungod kay daan na silang kauban sa us aka kwalisyon uban sa partido BARUG ni Mayor Michael Rama.

Nakadani sa akong pagtagad ang rason ni Daluz nganong nakahukom siyang mosuporta ni Garcia inay mopadayon sa iyang tinguha nga mokandidato pagkamayor. Sigun niya, maoy gusto as administrasyon ni Presidente Bongbong Marcos nga si Garcia maoy magsilbing standard bearer sa ilang partido dinhi sa syudad. Gani nanumpa na si Garcia isip sakop sa Partido Federal ng Pilipinas (PFP).  

Kun mao asa man ibutang si kanhi Customs Commissioner Felimon Yogi Ruiz nga nangangkong maoy kandidato sa administrasyon? Matud ni Ruiz makigtagbo siya sa president e aron klarohon ang isyu.

Apan kun atong basihan ang sagad nga mga lagda sa mga partido sa ingon niini nga sitwasyon nga magkontra ang ilang mga miyembro mopatigbabaw gyud ang si bisan kinsa nga anaa na sa katungdanan.  Gitawag ni sa mga partido basi sa ilang mekanismo paghusay sa mga kontrobersiya nga sama niini og “equity of the incumbent.”

Tungod kay incumbent man si Garcia naa niya ang pabor ug ang dakong posibilidad nga maoy ituboy sa PFP nga ilang opisyal nga kandidato pagkamayor. Ug di nato kalimtan nga si Garcia pag-umangkon ni Gobernador Gwendolyn Garcia nga giisip nga labing impluwensiyado nga politiko sa Sugbo karon.

Makabalibad kaha ang PFP kun manghangyo ang gobernador nga ang iyang pag-umangkon maoy himoong standard bearer sa administrasyon? Kun dili man gani makuha ni Ruiz ang certificate of nomination gikan sa PFP mas maayo pang mosibog siya sa iyang tinguha nga magmayor ug mokonsiderar sa pagpapili sa mas ubos nga pwesto sama sa pagkakonsehal.

Bata pa si Ruiz ug daghan pa ang oportunidad nga nagpaabot niya.