EDITORYAL - Paburot sa DepEd budget?

Nagkadako na gyud ang guna tali sa kampo sa mga Duterte ug mga Marcos ug kuli nang magkabalikay pa sa maayong buot. Ning bag-o seryoso nga akusasyon ang gipasangil ni Bise Presidente Sara Duterte Carpio kang House Speaker Martin Romualdez ug mga kaubanan sa naulahi diha sa Ubos Balay Balauranan.

Gipasanginlan ni Sara si Martin, chairman sa House Committee on Appropriations nga gimanipula niini, ang gipangayo niyang budget para sa pagpatukod og mga eskuylahan ug lawak-saringan sa tibuok nasud sukad pa sa miaging tuig.

Matud pa sa bise presidente sa dihang siya pay kalihim sa Edukasyon, dunay kongresista nga niduol kaniya niadtong 2023 ug nipadayag nga naa na ni Sara ang kagawasan kun tukoron niya ang mga nagkulang nga mga school buildings apan mipasupot og estorya "kun pilay maila" sa pangayuong budget.

Matud ni Sara P5 bilyones lang ang budget nga iyang gipangayo para niini apan dihang wa siya nisugot sa sugyot gikataho nga gipaburot sa mga kongresista ang budget, gikan P5 bilyones gihimo kining P15 bilyones, matud sa VP, ang P10 bilyones giingong gipaubos sa pagdumala ni Romualdez.

Seryuso ang akusasyon ni Sara, pwede kaayo niyang pangkasohan ang iyang mga gipasanginlan ug wala na gipaagi og siyam ka minutos niya nga recorded video nga gipanghatag ngadto sa mga tigbalita. Pwede gyud niya ipatawag ang media aron mapangutana sab siya direkta ug dugang impormasyon bahin sa iyang mga akusasyon. Kadto ganing mga yanong 'whistle blowers" kaniadto maisugon man ganing niwadwad sa ilang nahibaw-an aron manubag sa balaod ang mga sad-an.

Usa pa, si Sara gigisa nang daan sa mga nangaging budget hearings sa mga magbabalaod tungod sa matud pa naghinobra ug dali kaayong pagkahurot sa iyang pundo ug kun giunsa niya kini paggasto. Ang hearing kanunay nisangpot sa mainitong tinubagay tali sa komitiba ug sa iyang buhatan. Di malikayan nga magduda ang mga tawo sa motibo aning iyang video.

Di sab siya pwedeng makapangangkon nga di niya kayang banggaon ang iyang mga gipasanginlan kay siya maoy kalihim sa DepEd kaniadto ug kasamtangan siya karon maoy Bise Presidente sa Republika. Dako kini og matabang pagpalig-on og balik sa suporta sa 33 milyones nga nibotar niya kun mapapriso niya ang mga sad-an.

Kung naa gyud siyay pruweba suportahan gyud siya sa katawhan sa iyang kawsa. Nasayud gyud siya nga di masilotan sa balaod ang mga tawong sad-an kun ipaagi lang sa estorya ug walay kasong ipasaka.