EDITORIAL - POOLED

Kinahanglang magpabiling parte sa kinabuhi sa tawo ang media

Ang industriya sa media padayong nag-atubang og dako ug kutas nga mga hagit. Ang tanan, print, broadcast, ug online media naapektahan gyud sa kapaspas nga paglambo sa digital technology, mao nga nihinay sab ang ilang kita.  Nasayod na tang tanan nga kining sitwasyon karon maoy nakaingon sa pipila ka mga sikat ug inila kaniadtong mga media companies nga nanirado o ba kaha giusab ang ilang pamaagi aron magpabiling makasakay sa panahon nga dili kinahanglang dako og gasto.

Apan bisan pa niini, si David Luther, usa ka digital content strategist, nagkanayon nga bisan aning napanglantawang kalisdanan, magpabiling baskog ang media.  Sa  usa ka nigawas nga artikulo sa Oracle Net Suite niadtong nakalabay’ng buwan sa Mayo, si Luther nagkanayon: "...the industry is adapting to the digital disruption that has marked the last two decades as the internet and social media have reshaped the market."

Hinuon, kasagaran sa gihimong sanglitanan ni Luther mga US media companies. Samtang dili hinuon layo nga mahitabo sab kini dinhi sa Pilipinas apan aduna nay mga nakitang gihimong kausaban daan, agi og pagpanagana, ang mga media companies dinhi sa nasud tungod sa nasinating hinayhinay nga pagkubos sa ilang kita.

Ang media dunay duha ka mga hagit nga giatubang karon , ang una kining paspas nga paglambo sa teknolohiya nga sa pagkatinuod dili daling mapangitaan og kasulbaran kay gawas nga dugay kini makat-onan sa tanan, kinahanglan kini og pundo.

Ikaduha kining pagkapul-anon sa mga tawo kay nawad-an na og interes pagbasa og mga balita. Mura lang kini og sayon paminawon apan silod kaayong sulbaron.

Sa gipagawas nga 2024 Reuters Institute Digital News Report, giila kining pagkapuol sa tawo sa mga balita maoy hinungdan nganong nigamay na ang mga tigbasa og pamantalaan ug menus kaayong partisipasyon diha sa online news.

Sumala pa sa maong report, ang mga daw napul-an na aning sige og basa o tan-aw og mga balita sa pamantalaan, telebisyon, radyo ug bisan sa mga online news sites.

Partikular sa ilang gilikayan kining mga balita bahin sa politika, krimen, sex ug ubang mga bayolenteng panghitabo. Apan nagpabiling kusog ang mga balita o estorya may kalabotan sa mga artista, sports, climate ug lakaw sa panahon.

Usa sa sanglitanan niini, dihang nakadaog si Carlos Yulo og duha ka bulawang medalya sa Paris Olympics, pwerteng lipaya sa tibuok Pilipinas ug giulan og pagdayeg sa mga Pilipino ang atleta.

Daghan ang nahimong interesado pagbasa og balita  ug pagpangita sa mga online sites aron makibalita kaniya apil na ang mga kontrobersiya bahin sa iyang pamilya nga negatibo paminawon. Positibo man o negatibo, nakapabuhi kini sa interes sa mga tawo ug maayo kini para sa media industry.

Niining pagsaulog sa ika-32 nga Cebu Press Freedom Week sugod Sept. 15 hangtud 21 maghatag unta kini og mga giya sa mga sakop sa media kun unsay makapabalik sa interes sa publiko pagbasa og pamantalaan, telebisyon ug online news sites.

Gusto nato nga magpabilin nga nungtan sa mga tawo ug importante sa ilang kinabuhi isip tighatud og mga impormasyon aron makatabang sab kanila pagpili og maayong mga umaabot nga lider nga makatabang sa ilang panginahanglan ug maghatud sa nasud ngadto sa kalamboan.