Way dungog ang pamintaha

Piligrong hingpit nga matangtang sa listahan sa mga kandidato pagkamayor sa dakbayan sa Mandaue ang gitaktak nga mayor nga si Jonas Cortes.

Kini human gimando sa second division sa Commission and Elections ang pagkanselar sa iyang Certificate of Candidacy tungod sa giingong material misrepresentation basi sa petition ni Atty. Ervin Estandarte.

Sigun sa petition ni Estandarte wala kuno ideklarar ni Cortes sa iyang CoC ang iyang kaso diin gisilotan siya sa Ombudsman og Perpetual Disqualification paghupot og bisan unsang katungdanan sa gobyerno.

Sigurado hinuon ko nga moabot pa ang lantugi niini sa Korte Suprema. Apan nahibawo ang publiko unsa ka impluwensiyado ang mga tawo nga nagpaluyo sa disqualification ni Cortes.

Busa di imposible nga ipugos gyud pagpatuman ang cancellation sa COC kun way temporary restraining order nga makuha ang kampo ni Cortes.

Ug posibleng mahimo ning pabilo sa kagubot sa eleksiyon diha sa Mandaue sanglit sigurado ko nga di ni dawaton sa mga dumadapig sa kanhi mayor sa dakong kasayon.

Gani nagsugod na og protesta atubangan sa buhatan sa Comelec ang mga supporters ni Cortes niadtong Biyernes.

Di sab bitaw makiangayon kun hingpit did-an si Cortes nga molansar samtang dili pa penal ang desisyon sa iyang kaso.

Dili ra siya maoy nag-atubang niining maong sitwasyon ug wala sila pugngi nga makapapili sa eleksiyon. Simple ang rason niini—aron dili ma disenfranchise ang mga botante ug mopatigbabaw ang demokrasya.

Samtang dili pa final ang desisyon sa kaso ni Cortes nga tataw pud nga politika maoy hinungdan, mas maayo tingali nga pasagdan una siya nga makapadayon sa iyang kandidatura.

Anaa na sa mga Mandauehanon ang paghukom sa umaabot nga eleksiyon kun angayan pa ba siyang hatagan og mandato o angayang papahuwayon na sa katungdanan.

Dili makiangayon alang sa mga taga Mandaue nga gamiton ang impluwensiya aron makapabor sa eleksiyon.

Gawas pa nagpakita ni sa insecurity ug kakuwang sa pagsalig sa iyang katakos nga modaog sa limpiyo ug patas nga piniliay.

Way dungog ang pagdaog og eleksiyon sa pamintaha pinaagi sa pag-eliminate sa imong kaatbang.

Dili ba mas tam-is ang kadaugan kun imo ning naangkon sa limpiyo ug tinarong nga piniliay?