Gilain og sabot

Daghang miisa ang kilay dihang gianunsiyo ni Talisay City Mayor Samsam Gullas nga adunay plano ang iyang administrasyon nga palamboon ang "Talisay City side" sa South Road Properties o SRP.

Matud sa taho sa The Freeman nga gusto nga makita ni Gullas ang "Talisay side" sa SRP nga molambo usab nga adunay mga hotel, restaurant ug coffee shop, sama sa maong reclamation area.

Apan daghan ang mitiyabaw gumikan kay mora kuno nga nangangkon si Mayor Gullas nga adunay porsiyon sa SRP nga gipanag-iya sa dakbayan sa Talisay nga sayod man ang tanan nga ang maong reclamation project giugmad man sa Cebu City.

Adunay mibatikos sa maong taho, apil na kadtong mga giingon kunong mga urban planner nga nasayod sa history sa SRP. Hangtud nga nabalik na hinuon ang kontrobersiya sa SRP nga adunay porsiyon nga giangkon sa Talisay kaniadto.

Apan sa akong pagbasa sa report sa maong pamantalaan, wala ko kabasa nga nangangkon si Mayor Gullas nga adunay porsiyon sa SRP nga gipanag-iya sa dakbayan sa Talisay nga iyang palamboon.

Ang giingon ni Mayor Gullas nga "Talisay side" sa SRP maoy gusto niyang palamboon. Ug nagpasabot kana sa area gikan sa tulay nga maoy boundary hangtod sa banda unahan sa fish ug container ports.

Ang problema mao nga dali kaayong makabatikos ning pipila nga wala man lamang hunahunaa ang unod sa gipamulong ni Mayor Gullas. Kay lagi aron ingnon nga maayong laki ug sila ray insakto sa social media.

Klaro kaayong ilalum sa hurisdiksiyon sa Cebu City ang SRP. Ug wala siguroy kapasidad ang Talisay City nga mangangkon og porsiyon niini. Inay nga magsugnod og laing kontrobersiya, mas maayo nga gi-interpret og insakto sa mga mibatikos ang pamahayag sa mayor.