Panaghiusa sa mga mamamahayag

Sa makausa pa, maghugop na usab ang mga sakop sa industriya sa media dinhi sa Sugbo aron pagsaulog sa kagawasan sa prensa sa nasud. Kagahapon gisugdan kini pinaagi sa usa ka opening fellowship didto sa Robinsons Galleria.

Ang selebrasyon sa Cebu Press Freedom Week naglambigit sa usa ka semana nga nagkalainlaing forum sa mga sakop sa prensa ug uban pang mga panagtigum nga gitumong pagpalambo sa ilang propesyon.      

Sa kapin tulo ka dekada, ang Cebu Press Freedom Week naghatag og dakong kahulogan sa mga mamamahayag ug media sa Cebu. Bisan pa sa grabe nga kompetisyon sa pagkuha og mga balita, ang kasaulogan nagpakita nga ang panaghiusa ug kolaborasyon mahimong posible alang sa kaayohan sa tanan.

Ang Cebu Press Freedom Week dili lang usa ka selebrasyon, apan usa ka plataporma diin ang mga mamamahayag makig-uban ug magtinabangay. Ang mga kalihokan sama sa sports tournament, mga forum, ug mga learning sessions alang sa mga journalism ug communication students naghatag og higayon nga magkauban ang mga mamamahayag sa usa ka positibo ug produktibong paagi.

Ang selebrasyon usab naghatag og kahigayonan nga mapalambo ang media literacy ug makig-uban sa mga news sources. Kini nga mga kalihokan nagpalig-on sa relasyon tali sa mga mamamahayag ug sa komunidad, ug naghatag og dugang nga paglaum alang sa umaabot nga henerasyon sa mga mamamahayag.

Bisan pa sa mga hagit nga giatubang sa media karon, sama sa pag-abuso sa social media ug pagpakaylap sa mga bakak nga impormasyon, ang Cebu Press Freedom Week celebration nagpahinumdom kanato sa importansya sa pagpanalipod sa kagawasan sa pamahayag.

Kini nga kasaulogan naghatag og dakong bili sa mga sakripisyo sa mga mamamahayag nga maoy nag-una sa pagpanalipod sa kagawasan sa pamahayag ug naghatag og inspirasyon sa mga bag-ong henerasyon nga magpadayon sa ilang misyon.