"Unfair" ba diay ang pagtug-an sa tinuod?

Sa usa ka opisyal kang kansang pamilya nanag-iya og usa ka mantalaan, labaw kay ni bisan kinsa siya unta maoy angayang unang makasabot sa trabaho sa mga tigbalita.

Apan sukwahi ang nahitabo ni Cebu City acting Mayor Raymond Garcia.

Labihang sukoa sa acting mayor niadtong Biyernes tungod kay wa siyang kauyon sa mga report sa media sa nagpadayong Palarong Pambansa dinhi sa dakbayan.

Tungod sa iyang kalagot bisan ang mga inosenteng reporter napagan ug iyang gipakauwawan atubangan sa ubang mga opisyal atol sa iyang gipatawag nga convergence meeting didto sa City Hall.

Malisyoso ang iyang gibuhat ug klarong gitumong aron pakauwawan ang mga reporter atol sa tigom.

Sa wala pa ang convergence meeting nahinabi na siya sa mga reporters aron pangutan-on sa mga isyu maylabot sa nagpadayong Palaro apan wala siya manukmat sa mga tigbalita.

Iyang gitukoy ang mga reporter didto sa convergence meeting ug gipakauwawan hinungdan nga mi "walkout" ang mga sakop sa City Hall beat.

Gikatahong ang nasuk-an og maayo sa acting mayor mao ang report nga migawas sa mantalaan nga gipanag-iya mismo sa iyang pamilya.

Napun-an ni sa report sa The Freeman mahitungod sa gipahibawo sa technical committee sa Palaro nga kuwang sa sukod ang track oval sa Cebu City Sports Center hinungdan nga dili nila i-recognize ang bisan unsa nga record nga matala sa track events hangtud nga makapresentar ang kontraktor sa hustong sukod nga 400 meters.

Ang report nga unang nasuk-an ni Garcia mao ang reklamo sa mga delegado nga wa silay supply sa tubig.

Matud sa acting mayor "unfair" ang media nga pulos negatibo ang report.

Dili "unfair" ang pagpadangat sa tinuod. Ug isip opisyal sa dakbayan iyang responsibilidad ang pagsiguro nga nahatagan sa tanang batakang panginahanglan sama sa tubig ang mga delegado.

Ug basin nakalimot na si Garcia nga ang mga tigbalita nga iyang gipasanginlang "unfair" mao ra usab ang mga reporter nga mitaho sa tanan niyang kalihukan sa City Hall apil na ang iyang papogi points bahalag maguba ang iyang relasyon sa iyang kaalyado sa politika nga si suspended mayor Michael Rama. Nakalimot na ba si Garcia giunsa niya pagpahumot sa publiko dihang miasumir isip acting mayor ug unsay papel sa mga tigbalita aron maabot sa katawhan ang iyang gibuhat?