Share your blessings: Hydrate Cebu Initiative

Kini ang gipasiugdahan ni Konsehal Dave Tumulak, Chairman sa Disaster Response Committee isip proactive measure sa epekto sa very strong El Niño ug sa pagsaulog sa Sinulog 2027,.Nagpakita  kini og usa ka  mapuslanong lakang alang sa atong katawhan.

Ang inisyatiba sa pagpahimutang og libreng mainom nga tubig sa mga merkado, simbahan, tunghaan, ug uban pang pundokanan, dako kini og kaayohan alang sa panglawas sa publiko. Taliwala sa grabeng kainit nga dala sa El Niño, dako ang risgo sa heat stroke ug dehydration ang pagkauga sa tubig sa lawas.

Kini ilabi na sa mga nagtrabaho nga direktang maigo sa init sa adlaw sama sa mga mamumuo, manindahay, commuter, mga tigulang ug ubang sakop sa vulnerable sector. Ang paghatag niini nga libre  usa ka tawhanong lakang nga naghatag og kaayohan sa mga kaigsoonang nagkinahanglan. Usa ka hiyas sa pagtinabangay sa komunidad ug sa mga patigayon nga wala lang mag-agad sa kaban sa gobiyerno.

Samtang dunay angayang tan-awon o seguradohon  ug hatagan og pagtagad ilabi na ang mga posibleng risgo o peligro sa panglawas kong dili ma inspeksyon ang mga water dispenser, mahimo kining tinubdan sa mga sakit nga gikan sa kontaminadong tubig o gigamit nga mga baso.

Mas maayong magdala og kaugalingong tumbler subay sa programa ni Mayor Nestor Archival ngq gidili ang pagamit og mga bottled water. Ang mga establisemento nga mohimo niino dili pud seguro iresgo ang ilang ngalan ug maseguro nila nga limpyo ug luwas sa kontaminasyon ang libreng tubig nga ilang ipaambit sa mga tawo.

Matud ni Konsehal Tumulak nga aduna nay daghang mga negosyante nga misanong sa inisyatiba ug nagpaabot usab sila sa mga simbahan nga mosanong sa programa kay gamit kaayo kini sanglit ang simbahan ang usa sa hugopanan sa mga tawo. Unta mopatigbabaw ang pagkatawo sa atong mga kaigsoonan sa pagpaambit sa tubig niadtong mga tawo nga giuhaw.

Gipakagamay man kini sa uban apan alang sa mga nagkinahanglan dako na kaayo kini og ikatabang kanila.

Kong nahimo kini sa Cebu City walay rason nga dili kini mahimo sa ubang mga LGUs. Ug alang sa mga gustong mopaambit kong duna kamoy igo igong ikatampo ayaw sa pagpanuko sa pagtabang kay kana ang mamahimong makaluwas sa kinabuhi sa tawong nagkinahanglan.