22 atleta ipaparada ng Pilipinas sa Paris
MANILA, Philippines — Binubuo ng 22 matitikas na atleta ang Team Philippines na magtatangkang humakot ng medalya sa 2024 Paris Olympics na papalo sa Hulyo 26 sa France.
Ito ang pinal na bilang ng pambansang delegasyon — ang pinakamalaking bilang ng atleta na sasabak sa Olympics sapul noong 2000 Sydney Olympics.
Huling umabot sa 20-athlete mark ang Pilipinas sa Sydney Olympics na ginanap sa Australia kung saan may 20 atleta ang sumalang ngunit bigong makapag-uwi ng medalya.
Malaki rin ang delegasyon ng Pilipinas noong Tokyo Olympics na may 19 atleta sa pangunguna ni weightlifter Hidilyn Diaz na siyang nag-uwi ng kauna-unahang gintong medalya ng bansa sa Olympic Games.
Ibabandera ng Team Philippines sa Paris Olympics sina boxers Nesthy Petecio, Carlo Paalam at Eumir Marcial — mga medalist sa Tokyo Olympics.
Parehong may pilak sina Petecio at Paalam habang may tanso naman si Marcial.
Sasabak si Petecio sa women’s 57kg habang masisilayan sa aksyon si Paalam sa men’s 57kg at aariba naman si Marcial sa men’s 80 kg.
Kasama nina Petecio, Paalam at Marcial sa boxing event sina Aira Villegas (women’s 50kg) at Hergie Bacyadan (women’s 75kg).
Magtatangka ring humirit ng gintong medalya sina pole vaulter EJ Obiena at gymnast Carlos ‘Caloy’ Yulo na target rumesbak matapos mabigong makasungkit medalya noong 2021 Tokyo Games.
Paborito si Obiena na makapasok sa Top 3 sa kanyang event habang dalawang gintong medalya ang posibleng mahablot ni Yulo mula sa men’s floor exercise at men’s vault events.
Bukod kay Obiena, pasok din sa Paris Games sina John Cabang at Lauren Hoffman na parehong sasalang sa hurdle events.
Makakasama naman ni Yulo sa gymnastics sina Aleah Finnegan, Levi Ruivivar at Emma Malabuyo.
Pasok din sina golfers Bianca Pagdanganan at Dottie Ardina, judoka Kiyome Watanabe, weightlifters Vanessa Sarno, Elreen Ando at John Ceniza, swimmers Kayla Sanchez at Jarod Hatch, fencer Samantha Catantan, at rower Joanie Delgaco.
- Latest
