EDITORYAL — Daming vape stores sa paligid ng school

HINDI nagagampanan ng Philippine National Police (PNP) ang kanilang tungkulin sa mga ­naglipanang vape shops sa paligid ng eskuwelahan at mga estudyante ang parukyano. Paglabas ng mga estudyante sa school, sa vape shops sila deretso at nagpapakasugapa sa vape.

Noong nakaraang taon nangako ang PNP sa Department of Health (DOH) na babantayan ang mga vape shops na nagbebenta sa menor-de-edad pero ang pangako nila ay napako.

Nang maupo sa puwesto si Finance Secretary Ralph Recto, nangako siya na ipapanukala ang pagbabawal ng lahat ng uri ng mga disposable vape products sa Pilipinas. Ayon kay Recto, karamihan sa disposable vapes na ipinagbibili sa bansa ay hindi rehistrado sa Department of Trade and Industry (DTI). Hindi rin umano nagbabayad ng excise taxes ang mga ito. Ang DTI ang nangangasiwa sa bentahan ng disposable vapes sa bansa.

Ikinatuwa naman ng DOH ang hakbang ni Recto na ibawal ang disposable vape products. Ayon sa DOH lahat nang vape products ay mapanganib sa kalusugan. Ang disposable vapes ay gawa sa plastic at batteries at nagtataglay ng harmful chemicals na kapag nalanghap ay delikado sa baga.

Noong Hulyo 2022, naging batas ang Vape Bill kahit hindi nilagdaan ni President Ferdinand Marcos Jr. Layunin ng batas na ma-regulate ang importasyon, paggawa, pagbebenta, distribusyon, at paggamit ng vaporized nicotine at non-nicotine products.

Bago ito naging batas, maraming sumalungat sapagkat mapanganib sa kalusugan. May sangkap itong nicotine, propylene glycol, carbonyls at carbon mono­xide na nagiging dahilan ng cancer sa baga. May naitala ng kaso ng vape associated lung injury noong 2018. Nakuha niya ang sakit sapagkat ang mga kasamahan niya sa bahay ay gumagamit ng vape.

Pangunahan naman sana ng local government units (LGUs) ang pagbabawal sa vape sa kanilang lungsod at bayan. Sa kasalukuyan, ang Valenzuela City at Pasig City pa lamang ang nagbabawal sa vape smoking. Gayahin sana ito ng iba pang lungsod para mailigtas ang kabataan sa pagkakasakit. Huwag silang hayaan na masira ng bisyong ito. Ipasara ang vape shops sa bisinidad ng eskuwelahan.