In Pericolo Mortis

Matag Sabado among naandan nga dunay pagahimoon nga Misa ug Hilog sa mga Masakiton. Sa kaulahian pagahimoon pud ang deliverance sessions. Samtang naniudto mi nakadawat ko og chat gikan sa usa ka aktibong principal sa usa sa mga tunghaan sa Malabuyoc kay lagi dunay pagahilogan.

Human sa paniudto miadto dayon ko sa tambalanan. Usa ka hamtong ang nagmasakit og CPD kun Chronic Pulmonary Disease. Igo gyud niini ang baga.

Tungod kay wala man silay kasal segun sa mando sa talahurong padre kura Padre Kokoi dela Peña ako silang gikasal sa rason sa in pericolo mortis kun endanger of death. Luoy kaayo tan-awon ang pasyente ug gani luoy gyud ang ilang pamilya kay daghan sa ilang mga anak nga nangamatay sa susamang balatian. Mga unom ka mga anak ang nawala gumikan niini.

Mubo ra gyud ang kinabuhi sa tawo. Ug dili pud nato  matag-an kun hangtud asa kini kutob. Mao nga angayan gyud lamang nga mangandam ug mag-amping.

Sa akong bahin isip pari, nahimong kumpleto ang adlaw alang kanako.

Bisan pa man kun naglagiting ang kainit sa adlaw ug nahikawan sa pahuway sa udto gumikan sa maong emergency apan salamat sa Dios nga bisan kun dili takos nakaluwas gihapon og kalag.

Kini ang maisip natong ganti sa tanang mga ganti. Matud pang San Juan Bosco mahimoong kuhaon gikan kanako ang tanan, ang mahinungdanon ihatag kanako ang mga kalag! Bisan unsay dangatan sa maong pasyente, malinawon na siyang moatubang sa Dios. Deus Vult!