Problema sa liderato

May sukaranan ang panawagan sa Konseho sa dakbayan sa Sugbo nga hulipan ang pangulo sa City Agriculture Department taliwa sa dakong problema sa dakbayan sa epekto sa huwaw didto sa kabukiran.

Pinaagi sa usa ka resolusyon nga giduso ni Konsehal Jun Alcover human sa iyang privilege speech niadtong Miyerkoles, giawhag sa konseho si Mayor Michael Rama nga tangtangon si Joelito Baclayon isip city agriculturist tungod sa "incompetence."

Nasagmuyo kaayo si Alcover, isip tsirman sa committee on agriculture, sa kapakyas ni Baclayon sa pagpangandam sa epekto sa El Niño.

Ang kakuwang sa plano ni Baclayon unsaon nga maminusan ang epekto sa huwaw ngadto sa mga mag-uuma nagpakita ni nga siya incompetent o dili makamao sa iyang trabaho.

Partikular nga gitumbok ni Alcover ang wala magkadimao nga paagi ni Baclayon unsaon pagtabang ang mga mag-uuma nga apektado sa huwaw.

Sumala ni Alcover nga naproblema sa tubig ang mga mag-uuma sa kabukiran apan ang tubag ni Baclayon niini manghatag hinuon og libre nga binhi.

Husto si Alcover nga sa kadugay na ni Baclayon sa pwesto angayan unta nga duna na siyay sistema o mga pamaagi mahitungod niini.

Dugay na nga nagpunay og awhag si Alcover nga mangandam sa huwaw. Gani niadto pang miaging tuig siya nagsubmitir og rekumendasyon apan wala ni tagda ni Baclayon ug sa buhatan mismo sa mayor.

Kun gituman pa ang rekumendasyon ni Alcover posible unta nga naminusan ang epekto sa mga mag-uuma.

Apan sa akong tan-aw di lang si Baclayon ang problema. Ang problema anaa mismo sa liderato sa syudad tungod kay naabot man mismo sa buhatan sa mayor ang maong mga rekumendasyon.

Ug gani usa sa mabasol nganong nagnihit ang supply sa tubig sa kabukiran mao ang buhatan sa mayor mismo tungod kay giyak-an niini ang mga permit alang unta sa pagpamutang og mga linya sa tubig paingon sa kabarangayan gikan sa Lusaran bulk water supplier sa MCWD.

Sigun ni Alcover nga ilang nahibaw-an nga wala pirmahi sa mayor ang gikinahanglang mga permit. Nisangit kuno kini sa buhatan sa city administrator.

Ambot unsay hinungdan sila ray makatubag niini. Kun wala pa lumlumi ang permit hayan nahuman na ang mga linya sa tubig ug nagamit na unta sa mga mag-uuma.