EDITORYAL - Giputla’g sungay

Niadtong naigo sa Super Typhoon Odette ang Kabisay-an, usa sa dakong problema ang enerhiya human daghan sa mga poste ang natumba. Gani naabtan pa og duha ngadto sa lima ka bulan ang ubang lugar una pa nabalik ilang kuryente.

Nakasabot hinuon ang tanan nga dili basta dayon mabalik ang kuryente kun dili pa makabarog og balik ang mga poste. Mao nga usa sa mga solusyong Nakita sa katawhan mao ang paggamit og generators.

Apan bisan duna nay generators, grabe sab kalisod ang pagpalit og petrolyo sama sa gasoline o krudo aron kini paandaron. Tungod kay daghan sa mga gasolinahan ang nangwarta ug namintaha sab pinaagi sa pagpataas og maayo sa ilang presyo matag lito.

Gani naabot pa og P150 ang matag litro ang gasolinanug krudo, walay pili. Tungod pud kadto sa ubang mga indibidwal nga kakunsabo ang pumpboys sa mga gasolinahan  maoy mobaligya aron ibaligya sab sa gawas.

Ang resulta, daghang mga tawo nga daan nang nag-antos sa epekto sa bagyo.

Apan kaning tanan pwede ra untang malikayan kun sa panahon sa emerhensiya adunay katungod ang gobiyerno pagdumala sa mga vital installations alang sa dinaliang paghatag og alibyo sa kalisdanan sa katawhan anang mga panahona.

Karong bag-o, ang Korte Suprema mibali sa desisyon sa Court of Appeals nga nagdeklarar nga unconstitutional ang probisyon sa Section 14, paragraph E sa Republic Act 8479 o Downstream Oil Deregulation Act of 1998 nga nag-ingong sa panahon sa emerhensiya, ang Department of Energy mamahimong maoy modumala sa mga oil companies.

Karon nga giklaro na sa Korte Suprema ang maong balaod, ang seryusong pagpatuman nalang niini kun dunay katalagmang mahitabo ang  paabuton.

Aning paagiha, mas mapadali ang pagbangon sa mga apektado sa katalagman tungod kay dako og ikatabang ang petrolyo sa pagpadagan sa ekonomiya bisan sa panahon sa emerhensiya.

Dili na unya makagara-gara ang mga oil companies ana ilang kahakog panahon sa panginahanglan sa katawhan.