Lobo kauban sa mga manok

Mipasidaan ang Department of Justice (DoJ) sa mga government officials ug kapolisan nga mahimo silang manubag kon masayran nga mi-kooperar sila sa imbestigasyon nga gihimo sa International Criminal Court (ICC) sa kampanya batok sa druga sa miaging administrasyon. Gisagop sa DoJ ang polisiya sa dili pag-kooperar sa ICC tungod kay aduna man kita’y naglihok nga sistema sa hustisya.  Matud pa bitaw sa akong amigo, “Kon moko-operar kita sa ICC, sama ra’g nagpasulod kita’g lobo sa tangkal sa mga manok unya magdahom kita nga magdula ug magdulog ra sila nga malinawon”.  Madahaan!

Basta spoiled, malata ra

Nanawagan ang Estados Unidos ug ang Pilipinas ngadto sa China sa paghunong na niini sa iyang gihimo nga "unlawful interference” sa katungod sa mga Pilipino sa pagnabigar sa South China Sea ingon man sa pagtuman sa “final and binding” nga hukom sa Permanent Court of Arbitration didto sa Hague, Netherlands.  Sayod kita nga dili mahudlat sa pulong lamang China.  Gani, dako ang posibilidad nga mas palapdan pa sa China ang ilang presensya sa South China Sea.  Ang China nagpakita nga daw usa kini ka “spoiled brat”.  Apan sagdi lang kay matud pa sa panahom sa kabataan, “Duh, basta spoiled, malata ra na”.  Muleeng!

Sulbad ang pangitaon

Gisubli na usab ni Cebu City Councilor Pastor Alcover ang iyang panawagan nga pakanaugon sa iyang katungdanan si Joey Baclayon isip hepe sa Cebu City Agriculture Department.  Matud sa konsehal nga wala gayod matubag ni Baclayon ang suliran sa mga mag-uuma sa bukiran’g barangay ni’ng panahon sa El Nino.  Kon modemiter si Baclayon, masulbad na ba kaha ang kalisod sa mga mag-uuma nga matud pa, ang El Nino man kaha ang hinungdan?  Angay tamdon ang panahom nga “Kondenaha ang sayop ug dili ang nagbuhat niini”. Saoonz!

May’pa maglana’g potot

Bisan pa man sa nagpadayon nga Balikatan Exercise, gikataho nga padayon gihapon ang pagpanghasi sa Chinese Coast Guard sa mga mananagat sa kadagatan sa Panatag Shoal hinungdan nga mikunhod pag-ayo ang ilang kuha nga isda sa maong lugar.  Wala diay panumbalinga ni mopakita’g kahingawa ang China sa Balikatan exercises. Kon mao kana, dili na lang nato damhon nga adunay makab-ot nga makiangayon nga solusyon ang isyu sa West Philippine Sea.  Mao kana’y giingon nga, “Basta isyu sa West Philippine Sea, may’pa nga maglana kita’g potot”.  Fezteleern!

. 

Pulihan og mga usher

Naalarma si Cebu City Councilor Nestor Archival sa dihang nasayran sa konseho nga walay record ang City Treasurer’s Office (CTO) sa mga tax exemptions nga gi-aprobahan sa konseho.   Kay wala man ma-record kining mga tax exemption, dayag usab nga dili mahibaw-an kon pila na ang buhis nga wala makolekta.   Katapol ba kaha o kakulang sa pagpakabana kining wala pagrecord sa CTO sa mga tax exemption.  Matud pa sa akong amigo, “Maayo pa’y hulipan kining mga empleyado sa CTO sa mga usher ug coordinator sa illegal nga Swertres ug Masyao, kay di gyud sila mosipyat pagrecord sa halin”.  Pagkatoytoy!