"Napagan lang si Mayor"

Mao kini ang gipadayag sa upat ka mga regular nga kawani sa Cebu City Hall sa kaso nga ilang gisang-at ngadto sa Ombudsman batok sa mga opisyal sa dakbayan sa Sugbo tungod kay mao man kini ang nipirma sa tanan nga gidangatan nilang kalbaryo. Wala na nila maantos ang napulo ka buwan nga wala sila sweldohi, maayo unta kong adunahan pa ning trabahante apan yano ra intawon ug ang ilang sweldo ra ang gisaligan.

Nagsugod ang tanan sa pag asumir sa OIC  sa Assessor's Office diin gi-reasign ang upat mga kawani ngadto sa ubang departamento nga dili haum ug labaw na nga dili makaya sa ilang lawas kay ang tulo tiguwang na ang usa bag-ong nanganak.

Nihangyo sila nga ibalik sa naandan nga assignment apan nagmagahi ang departamento nga ilang gigikanan hangtud nidangop sila sa Civil Service Commission nga mipabor kanila apan wala gihapon ilha sa City Hall hangtud wala na kaagwanta ang mga kawani ug nidangop na sila Ombudsman.

Pebrero nila giduso ug paspas kaayo ang pagresolbar sa kaso nga nisangpot sa pagpahamtang og unom ka buwan preventive suspension sa mayor ug laing pito ka mga opisyal nga ubos sa ehikutibo. Ang mga kawani sagol ang gibati nila nga nalipay tungod kay nahatagan og hustisya ang nasinati nga pagpanglupig ug sa samang higayon naguol ug nalooy kang Mayor Rama kay maayo man kuno nila kini.

Ang bugtong mahitabo lang unta nila mao nga isipon silang tawo sa mga immediate bossing nila apan gahi pa sa bato ang kasing kasing kay naantos gyud nga napulo ka buwan gikulban sila og kaldero busa niresulta na ang karma niining mga opisyala.

Sa akong pakighinabi sa mayor wala man kuno siya masayod sa kaso ug sa sitwasyon sa mga kawani, posible usab nga tinuod kay basin nasobrahan ra ang iyang pagsalig sa mga tawo sa palibot, mopirma lang dayon siya sa mga dokumento nga iduso sa iyang lamisa maong naapil siya sa reklamo.

Lig-on gyud ang kaso kay naay resolution sa CSC ug gikan usab sa konseho sa dakbayan nga pasweldohan sila apan nagdumili pagtuman ang city hall kay basin gipagamay nila ang mga yanong trabahante apan mao naman hinoon kini ang nakabuno kanila.

Abi man nako og ang mga dagkong kontra sa mayor sama sa MCWD ug CPA ang maka knockdown nila, mas naunhan sila sa mga ordinaryong trabahante.

Sa nahitabo karon sa mayor dili malikayan nga motumaw ang mga pagduda basin adunay nagpaluyo niining tanan nganong dali ra kaayo naresolbar ang kaso? aduna kahay invisible hands nga nagmaneho niini aron masuspenso ang mayor nga dayag kaayong loyal sa iyang partido nga mortal enemy karon sa administrasyon.?

Ang tubag atangan nato sa mosunod nga panid niining drama karon sa politika.