EDITORYAL - Unsay sala sa 14-anyos?

Makaguol ug makayugot ang nahitabo sa 14-anyos nga dalagitang gipusil sa wala mailhing tawo diha sa panimalay sa biktima sa Dakbayan sa Talisay niadtong Biyernes sayo sa buntag.

Wala pay ideya ang kapolisan kun unsay motibo sa kriminal nga nipatay sa biktima. Labaw nang wala pa masayri kun kinsa kadtong nagtaptap sa nawong nga diretso lang nisulod sa pinuy-anan sa biktima nga walay kaluoy nga mipusil sa naulahi.

Wala gani makapanagang ang bata kay matud pa gidiretso ra kini og pusil sa maong tawo.

Dakong tanghaga para sa tanan, ilabi na sa mga otoridad kun unsay motibo nganong ang bata gipatay. Dunay daghang nanggawas nga mga pagduda ug pangagpas apan walay makakumpirmar niini.

Ang bata kauban sa pag-umangkon nga 12-anyos nagtuon sa ilang modules sa eskuylahan kay lagi ang mga bata sa balay lang man paeskuylahon tungod sa grabeng kainit sa panahon karon.

Ang Department of Education nipagawas na og pamahayag nga kusganong nagkondenar sa maong linoog nga pagpatay sa biktima.

Unsa man gyuy rason nga gipatay kini? Dili ba kaha kini atraso , o sakop ba kaha anang mga gangs ang biktima o natripingan og gang? May kalabotan ba kaha kini sa ilegal nga drugas?

May kalabutan ba kaha sa motibo ang iyang mga ginikanan o mga paryente? Kun may labot kanila ang rason sa kriminal pagpatay sa dalagita, unsa man kahay hinungdan?

Daghang mga pangutana nga hangtud karon wala pa matubag sa mga otoridad kay mismo gani ang pamilya sa bata wala sab makatuhop og maayo kun unsa gyuy hinungdan nga gipatay ilang anak.