Awahi na aron supakon ang BRT

Akong dasonan ang paghulagway ni Cebu City Mayor Michael Rama nga “stupid” kining sugyot nilang konsehal Jocelyn Pesquera ug James Cuenco nga hunongon ug hingpit nga ibasura ang nagpadayong BRT project dinhi sa dakbayan sa Sugbo.

Sa iyang privilege speech sa konseho niadtong Miyerkules, si Cuenco nga maoy chairman sa committee on transportation misugyot sa pagpangita og laing paagi unsaon nga mas kahatagan og sulosyon ang problema sa trapiko dinhi sa syudad.

Alang ni Cuenco dili ang BRT maoy tubag sa problema busa misugyot siyang tutokan ang laing mga proyekto sama sa Guadalupe-Lahug bypass road ug mass rapid transit (MRT) subway system. Matud niya pakyas ang BRT sa ubang mga nasud sama sa Hanoi didto sa Vietnam.

Sumala pa ni Cuenco dili sab maayo ang plano ug desenyo sa BRT project dinhi sa Sugbo. Daling gisuportahan ni Pesquera ang mga punto ug argumento ni Cuenco. Apan alang sa mayor ang pag-abandonar sa proyekto usa ka istupido nga lakang sanglit dako na og gasto ang gobyerno niini ug inutang sab ang pundo nga gigamit sa maong proyekto.

Ang BRT dunay kinatibuk-ang gahin nga moabot sa P28.78 bilyones human usba ang desenyo niini ug gipatas-an gikan sa 13.8 kilometros ngadto sa 17 kilometros.

Ang kwarta nga gigasto sa proyekto gikan sa US$198-million nga loan sa Agence Francaise de Development (AFD) ug World Bank.

Gani tungod sa kalangan sa pagpatuman sa proyekto migasto na ang gobiyerno og dul-an sa P30 milyones nga commitment fees nga kabahin sa kasabutan nga atong gipirmahan uban sa mga funding institutions nga nagpahuwam nato og kwarta.

Kun duna pay labaw sa pulong nga gigamit sa mayor, mao nay angay gamiton paghulagway sa lakang nilang Cuenco ug Pesquera. Diin man mo niadto dihang gisugdan pa og plano ang BRT? Nganong wala man mo motig-ik dihang gipresentar ni kaniadto?

Unya karon nga gisugdan na ug hapit na gani mahuman ang phase 1 sa proyekto kalit mo nga moingon nga di maayo ang plano ug desenyo? Mura ba og gikan mo sa sakit nga amnesia ug karon lang mo nakamgo nga di diay maayo ang maong proyekto.

Nakasabot ko nga dunay realignment sa politika diha sa dakbayan tungod kay hapit naman sab ang piniliay.

Apan mahimo ba nga ayaw idahig sa politika ang mga proyekto nga gigastohan og binilyon sa buhis sa katawhan. Dili ko siento porsiento nga uyon sa BRT apan awahi na aron ato ni nga ikanselar!