Gamay na lang pasensya

Ayuhon na gyud sa JFAP Construction ang mga guba nga bahin sa karsada diha sa Veterans Drive gikan sa Lahug Market paingon sa Barangay Busay nga naguba tungod sa ilang pipe-laying project.

Nasuta sa kadagkoan sa Department of Public Works and Highways (DPWH) nga wa tumana sa JFAP Construction ang tukma nga standards nga gilatid sa mga kondisyon sa paghatag kanila og working permit.

Ang JFAP maoy gikuha nga kontraktor sa MCWD aron moladlad og mga dagkong tubo sa tubig    gikan sa Barangay Busay paingon sa Lahug, ug ikonektar sa mga linya sa MCWD.

Ang mga tubo sa tubig nga gikutay sa JFAP, ug gilubong subay sa Veterans Drive maoy midawat sa tubig sa JE Hydro Bio-Energy Corporation, ang laing kontraktor sa MCWD nga nagkuha sa tubig gikan sa Barangay Lusaran ug gibuga diha sa Busay.

Isip sakop sa Cebu City Traffic Board, apil ko nga mi-inspection sa Veterans Drive kaniadtong Huwebes sa hapon, uban sa mga kawani sa DPWH ug MCWD. Nasuta namo nga wa gyud mapauli pag-ayo ang giguba nga karsada.

Tungod niini, gimandoan namo ang kadagkoan sa JFAP Construction nga usbon ang ilang trabaho. Dunay mga bahin sa karsada nga ipakutkot og balik, ug usbon sa pagsemento, ug pag-aspalto.

Ang tumong niini aron nga dili masakripisyo ang mga sakyanan nga moagi sa Veterans Drive. Unya, ang utlanan sa gitapak nila nga semento sa ilang pipe-laying project, pabutangan og kemikal nga aron dili makasu’d dayon ang tubig. Ang tumong niini, kay kon makasu’d ang tubig sa tinagdoan sa semento ug aspalto, maukal ra ang mga aspalto ug magabok ang mga semento sa karsada.

Pananglit nagpagahi-gahi pa ang JFAP Construction nga wa gyud nila trabahoa ang wa mamaayo pagpabalik nga giguba nila nga karsada, ang ilang “bond” didto sa DPWH nga kantidad og P12 milyones, maoy gastohon sa DPWH sa pagpaayo.

Alang sa mga motorista nga kanunay’ng mag-agian sa Veterans Drive, gamay na lang pag-antos. Ang among ikapasalig nga kami sa Cebu City Traffic Board nga gidumala ni Konsehal Rey Gealon, ug DPWH, magtinabangay aron mahibalik ang kanindot sa karsada.

* * *

Karon na lang gyud kutob ang pagpangampanya sa mga kandidato pagka opisyal sa barangay. Hapit ang tanan nangayo’g pagtugot nga makapahigayon sila og Miting de Avance karong gabii.

Dinhi sa Dakbayan sa Sugbo, kami sa Cebu City Traffic Board mitugot nga ang mga kandidato makapahigayon og Miting de Avance ubos sa kondisyon nga dili nila sirad-an ang karsada ug makaagi gihapon ang mga sakyanan.

Nanagani mi nga kon dunay emergency, sama nga dunay moagi nga fire truck, ambulansya, police vehicles, sayon ra ang pag-agi.

Mao nga gidid-an ang mga kandidato nga magbutang ug stage ug mga lingkoranan sa karsada.