Kinadak-an nga urom
Kon ang kampo ni Apollo Quiboloy maoy pabut-on, masubay lang sa mga lagda sa pag-serve arrest warrants sa kapolisan batok sa ilang pangulo kon pahibaw-on sila asa ug kanus-a himuon ang operasyon. Nipasangil ang mga abogado ni Quiboloy nga angay unta nga gipahibawo sa kapolisan ang bag-ong gitudlo nga tagduma sa kabtangan ni Quiboloy nga si kanhi Presidente Rodrigo Duterte.
Kon tumanon sa mga polis ang ilang gusto, mora silang mananghid ni Quiboloy. Kay bisan unsa nilang isulti ni Duterte segurong mapahibawo dayon sa sinumbong sa bangis nga mga krimen.
* * *
Kay wa man moreklamo ang mga abogado ni Quiboloy sa nangaging mga operasyon sa kapolisan sa wa pa ang Hunyo 10, kanus-a kapin sa gatos ka polis ang nilusad og dinungan nga operasyon sa tulo niya ka posibleng tagoanan, may sukaranan ang pagtuo nga gituman ang gipamugos nilang lagda.
Sa ato pa, posibleng nagpahibawo ang mga polis ni Duterte sa wa pa sila manuktok sa tulo ka kabtangan ni Quiboloy sa Buhangin ug Calinan districts ug Samal Island sa Davao City. Nga posibleng maoy katin-awan nganong wa silay nadakpan.
* * *
Nga posibleng mao say rason nganong kaduha na lahugaya ang kapolisan sa Davao:
Ang pagtangtang sa 35 ka opisyal sa kapolisan sa niaging buwan nga gikasuko pag-ayo ni Davao City Mayor Sebastian Duterte; ug
Ang pagtangtang sa kinatas-an nga opisyal sa kapolisan sa tibuok Davao Region nga gitumong pagkumbinser sa kanhi presidente ug sa iyang mga dumadapig nga natay-og ang Kampo Crame ug nagsusi sa pasangil nga nasobrahang puwersa sa operasyon niadtong Hunyo 10.
* * *
Maong mosamot nga di makatug nga maghayang ang kanhi presidente sud sa iyang moskitero sa Davao. Nireklamo siya nga di taga Davao ang gipuli sa girelibohan nga mga opisyal. Pero di na siyang ka-insistir nga mga polis nga linud-patay niya ang ipahimutang sa labing importanteng mga puwesto sa iyang kaugalingong nataran.
Mosamot ang iyang kabalaka. Nga di si Quiboloy ang tuyo sa maniobra. Nga posibleng dunay mas dakong tahas nga gipangandaman ang presidenteng iyang gipasanginlang bangag. Nga posibleng nahilambigit sa labing bangis nga urom nga nihasol sa iyang kinatulgan: Ang pagkabalhog sa mingaw ug nangamig nga prisohan sa The Hague.
* * *
- Latest
