Krisis sa WPS
Di lang kausa kon dili kaduha na mobalitok si Presidente Ferdinand Marcos Jr. sa West Philippine Sea (WPS) sud lang sa usa ka semana:
· Una, dihang iyang giaprobahan niadtong Biyernes ang rekomendasyon sa National Maritime Council (NMC) nga ipahibawo sa publiko ang schedule sa umaabot nga resupply missions sa Ayungin Shoal; ug
· Ikaduha, dihang gisugo niya si Defense Secretary Gilberto Teodoro niadtong Lunes nga ipasabot nga di diay itug-an sa Armed Forces of the Philippines (AFP) kanus-a sunod nga hatdan og pagkaon ang mga sundawo sa BRP Sierra Madre.
* * *
Makalikay lang si Marcos sa pasangil nga nagnukus-nukos human sa labing bayolente nga atake sa China batok sa mga barko ug mga sundawo sa Philippine Navy kon basulon si Executive Secretary Lucas Bersamin nga nagpataka lang og pangangkon nga iyang giaprobahan ang rekomendasyon sa NMC.
Pero kon palutson ang presidente mapilde ang credibility sa iyang pangabaga sa Malakanyang (nga di makalalis sa presidente ug busa kinahanglang mo-resign) ug makuwestiyon ang kapuslanan sa bag-o lang niyang gitukod nga NMC (kon ang ilang rekomendasyon mahimo ra man diayng sapawan ni Teodoro).
* * *
Posibleng mga rason sa pagbalitok sa presidente:
· Nidiretso lang og yango sa rekomendasyon ni Bersamin ug sa NMC sa way pagsusi unsay nahitabo sa Ayungin; pero
· Napugos pag-usab sa iyang baruganan human nakabatyag atol sa pagduaw sa Palawan niadtong Sabado sa hilom nga kasuko sa kasundalohan nga gitawag sa Malakanyang nga aksidente ug misunderstanding ang kabangis sa China nga nisamad sa pito nila ka kauban, apil ang usa nga naputlan og kumagko, nibuslot sa ilang rubber boats ug nikawat sa ilang M14 rifles.
* * *
Sa pagpangandoy og tarung nga liderato, mas masabtan nato ang kataphaw sa pagduma sa krisis sa WPS kon pahinumdoman ang atong kaugalingon nga kining presidenteha:
· Nakonbikto og tax evasion sa siya pay bise gobernador hangtod nga na-gobernador sa Ilocos Norte;
· Maoy administrador sa kinawat nga katigayonan sa ilang pamilya kansang utang sa estate tax (P203.8 bilyones) wa pa bayri; ug
· Nidaog sa eleksiyong presidensiyal sa 2022 tungod sa pagpabaha sa mga botante og fake news sa daghang katuigan ug pagbuhi og mas dakong lunop sa vote buying sa adlaw sa eleksiyon.
* * *
- Latest
