Peligro na diay ang gwapa karon

Dili diay sa tanang panahon bentaha ang maayo og panagway kay maghatag usab diay kini og peligro sa kinabuhi nga mosangpot pa sa gani sa mas grabe pa nga panghitabo sa kinabuhi sa uban, ilabi na kong adunay mga tawo nga masuyaon ug dili ganahan nga makakita og gwapa o gwapo sa ilang palibot.

Sama nalang sa tulo ka mga babaye sa dakbayan sa Sugbo nga tungod sa ilang kagwapa nadapatan gyud sila sa usa ka lalaki nga wala kauyon sa ilang panagway. Nahitabo kini sa managlahing dapit ug managlahing oras sa susama nga adlaw diin ang usa nasikhan sa mata, ang usa nasumbagan sa kuto kuto samtang ang usa nasumbagan sa ilong hinungdan nga nabuak ang ilong ug nadala gyud sa tambalanan.

Sumala sa mga biktima nga normal lang sa ilang kinabuhi nga maglakaw sa mga dapit sa syudad ug nornal usab nga adunay ikasugat nga mga tawo sama nalang sa usa ka lalaki nga murag normal ra usab sa unang tan-aw apan deadly diay kay sa walay pagpanuko gidagmalan sila.

Maayo nalang kay kamot ra ang gigamit, unsanon nalang kong aduna kiniy hinagiban ug gigamit sa pagpasakit sa mga biktima mas peligro pa gyud unta ang nahitabo sa ilang kinabuhi, maayo nalang kay naanghelan pa gyud sila niadtong higayona ug nadakpan ra usab ang lalaki nga nanapat kanila. Nahimong komedya ilabi na sa social media nga maayo nalang kay dili sila gwapa maong luwas maglakaw lakaw sa karsada, samtang kadtong mga dagwayan aw magnerbiyos gyud kay basin sila ang sunod nga target sa tawong naglagot sa mga maanyag, Alang sa uban kataw-anan kini nga panghitabo apan alang sa mga hingtungdan dako kining trauma nga magpabilin sa ilang galamhan.

Matud sa dinakpan nga naglagot siya kay abi niya og fake ang beauty sa mga babaye nga iyang natagboan maong iyang gidapatan, pastilan pagkabuang naman lang tawhana, posibleng aduna siyay deperensiya gyud sa utok o ba kaha ulipon siya illegal nga drugas niadtong higayona.

Mahulog nga isolated ra ang nahitabo apan angayan kini nga seryosohon nato kay bisan og gwapa o dili anaa gyuy mga tawong dautan nga naghuwat lang og timing nga makapanakit sa ubang mga tawo busa amping lang gyud aron dili masugamak sa mga tawong masakiton og utok kay kong maapike magpabuang buang ra ba dayon aron ingnon nga walay sala ang buang pastilan naman lang gyud.

Sa mga tinugyanan sa balaod angayan nga mas pahugtan pa nila ang ilang police vissibility aron mahadlok ang mga kriminal nga mihimo sa ilang dautang lakang kay naa may mga pulis nga magbantay sa mga dapit. Hinoon angayan daygon pud ang mga pulis nga daling nakadakop sa suspek kay kong wala pa magtabon na seguro og facemask ang mga gwapa kay basin sila na ang sunod nga mabiktima.