EDITORYAL - Pagpangdagit

Ang duha ka mga giingong development workers nga gialegar nga gidagit diha sa Pier 6 sa Cebu City, nabalik na sa ilang mga pamilya human sa lima ka adlaw nga pagkawala.

Naukay ang tanan, partikular sa social media sa dihang mikatap ug nag-viral ang usa ka video nga nagpakitang dunay komosyon nga nahitabo sa pantalan.

Ang video nagpakita nga dunay mga indibidwal nga pugsanong gipasakay sa ilang van.

Hinuon samtang madungog sa video ang tingog sa usa ka babaye nga nagsige og singgit og “help them” di kaayo gyud klaro ang mga panghitabo kay layo ra ang nahimutangan sa nagkuha.

Giingong nahitabo kini diha sa Pier 6 niadtong Enero 10, 2023. Sumala pa nga gikan pa nanaug sa barko gikan sa Mindanao sila si Dyan Gumanao ug Armand Dayoha sa dihang pugsanon silang gisignit.

Nabalaka gyud ang mga ginikanan ug kaila sa duha samtang ang mga militanteng pundok nipasangil sa gobiyerno nga maoy nagbuhat niini.

Niadtong Enero 15, 2023 gikatahong naka-contact ang duha sa ilang pamilya ug pagkasunod adlaw, Enero 16, 2023 nakauli na ang duha.

Ang pangutana karon, kinsa man kadtong mga nidagit sa duha ug kun unsa may ilang motibo o tuyo? Nganong walay bisan usa ka security personnel sa pantalan nga nipakgang sa maong pagpangdagit kun tinuod man.

Gawas sa bansag nga “development workers” ang duha, wala nay laing impormasyong nigawas bahin sa ilang mga backgrounds, kung gidudahan ba silang walhon o kun unsa.

Ang Cebu City Police Office naghimo na og ilang imbestigasyon bahin sa hitabo. Sa inisyal nga nadawat nga impormasyon nga gihatag sab sa kapolisan sa media, gialegar nga mga polis ang nagdagit sa duha.

Busa nanawagan karon ang CCPO sa duha ug sa ilang mga pamilya sa pagdangop sa ilang buhatan aron mahatagan og tukmang mga impormasyon bahin sa maong insidente ug makahimo og imbestigasyon.

Samtang tuod dili kaayo limpyo ang rekord sa PNP tungod sa mga pasangil nga pagpangabusar kaniadto pa, dili sab makatarunganon nga pasanginlan ang organisasyon kun walay ebidensiya.

Kun naagrabiyado mas maayong modangop sa otoridad ug isalig sa balaod ang tanan aron mapahamtangag silot ang mga sad-an. Makapanimbawot og balahibo kun tinuod man ang ilang mga pasangil.