Sakit

Pagbutho sa COVID-19 sa atong kinabuhi, napun-an ang nagkalainlaing sakit nga hagbay rang mitapot sa tawo. Kon ikaw taudtaod nang nag-antos sa diabetes, kidney, baga, hayblad o uban pang delikadong balatian, diin aduna nay giminting tambal nga imnon kada adlaw, mahingawa gayod kon may ikapalit pa bag medisina ning mga adlaw nga gipaundang kitag trabaho ug gipriso sa kaugalingon tang pinuy-anan.

Oras nga may importanteng paliton, dili ka kadalidali og gula sa balay. Kinahanglan nga magdalag quarantine pass, mag-face mask ug magbalo’g alcohol. Sanglit walay habalhabal nga kasakyan, maglakaw na lang paingon ngadto sa destinasyon.

Kon dunay 2 kilometros ang gilay-on, inig uli, kini madoble.

Pun-an, nga mga pinalit nga gibitbit bug-at, sakaon pa gyod ang dalan nga agian, ay, pastilan, pag-abot sa balay mongulngol ang mga tuhod dungan ang paghapyodhapyod. Oo, mao kining mga matanga sa sakit ang napuno!

Ang nahitalay sa middle class, walay ikalahutay pagtingob-palit og mga tambal ug inadlawng panginahanglanon alang sa usa ka bulan nga konsumo ning padayong pag-antos sa Enhanced Community Quarantine (ECQ). Samot, kon madugayan pa.

Busa, relihiyoso nilang gisunod ang balaod nga nalatid sa ECQ. Gusto silang maputol sa daling panahon ang kahasol nga nahatag sa COVID-19.

Buwahan, makabalik silag trabaho ug mahatagag igong pagkaon ang nagutman na nilang pamilya.

Apan unsa bay gibuhat sa mga pobre, kinsa maoy gihataga’g unang prayoridad sa gobiyerno? Sigeg gawas sa balay, sige’g tapoktapok ug duna pay nangaligog dagat.

Usab pipila kanila, nga ang pinansiyal hinabang nga nadawat gikan sa SAP, gisugal ug gihuboghubog lang. Sakit, nga sakit kaayong paminawon.

Mga middle class nga nakasaksi, nakapanglingolingo. Tiaw bay, sila nga mga taxpayers wala man gani nadawat, unya ang ilang kahago giusik-usikan lang sa mga walay trabaho?

Puwerteng luklok sa mga middle class sa ilang balay kay gustong ma-flatten na ang curve sa nangatakdan sa COVID-19. Unya, bisag gibantayan na sa kapolisan ang kadalanan, ang mga badlongon sige gihapog pabadlong.

Hinungdan, nga padayon ang pagtaas sa nangataptan. Haskang sakita!

Pagahilantawan, nga ang ECQ dinhi sa ato, dili pa malibkas sa Mayo 15. Molapas pa kinig dugaydugay. Ngano? Tungod sa sakit sa tawo nga daw wala nay tambal nga makaayo – ang sakit sa pagkagahig ulo.