P10K-ayuda, gamay ray nadala

Human mabalita sa usa ka international Indian media ang kahuyang ug kapalpakan sa pagpangulo ni Presidente Bongbong Marcos Jr. (PBBM), diin hasta ang P20/kilo of rice issue nahisgotan sa newscaster – mga negatibong binuhatan sa kinatas-ang lider nga dili mabalita sa mga higanteng mainstream media sa Pilipinas, kalit lang mipahigayon ang admnistrasiyong Marcos  og Bagong Pilipinas Serbisyo Fair (BPSF) ubos sa pagdumala ni House Speaker Martin Romualdez didto sa Tagum City (Hunyo 7-8, 2024)  diin ang pagpanghatag og mga ayuda ngadto sa 250,00 ka beneficiary nahimong kabahin niini.

Tuod man, gidugok sa nagpanon nga mga Dabawenyos ang maong kalihokan, kinsa tungod sa hagukang pagpamunoan ni PBBM ug sa kapakyas sa pagpalambo sa atong agrikultura, sila mao intawoy nag-antos sa tumang kagutom ug kalisod sa kapanginabuhian. Busa, may kahiubos man silang gihambin ilawom sa ilang dughan, ila kining gipadaplin. Hinungdan, init man o ulan, miapil sila sa hataas linya paingon sa DSWD representative nga maoy mohatag og tag P10,000 (ten thousand pesos) nga ayuda.

Angay hinumdoman. Ato ang maong kuwarta ug dili ilaha sa mga politiko. Ug dili maisip nga nakautang kitag kabubut-on kanila. Gani, kita man ang nagsuweldo kanilang tanan. Apan makapasubo! Usa ka mabdos nga Dabawenya, kinsa mikuha sa iyang ayuda sa nahisgotang BPSF, ang naghilak nga mi-post sa iyang personal nga kasinatian sa social media. Matud niya, taas kaayong oras iyang giantos sa paglinya.

Migaan iyang dughan dihang human mapirmahe ang dokumentong pirmahanan, gitunol sa taga DSWD ang sobreng may sulod nga P10K. Abi niyag iyaha na kini tanan. Apan kalit lang mibug-at iyang buot tapos sultii sa in-charge nga ipa-remit pa kuno niya ang maong sobre didto sa ilang barangay hall.

Ang makadismaya kay gikortehan ang nahisgotang P10K og P8,500 sa taga barangay hall. Hinungdan, puwerte nyang hilak samtang mihikyadhikyad sa P1,500 nga mao ra intawoy iyang nadala sa ilaha.

Mao ba kini ang gipanghambog ni Speaker Martin nga tatak Marcos-Araneta-Romualdez Ayuda brand sa ilang Bagong Pilipinas Serbisyo Fair? Diin ang ayudang gibalitang ipanghatag: P10K, unya ang aktuwal nadawat, P1,500 ra? Dili ba sama ra kini sa P20/kilo nga bugas, unya na-tag P50-pataas diay?

Intawon, hunonga nang punay ninyog pangatik, uy!