Paghawan sa agianan sa ICC
Nasobrahan ba tinuod ang puwersa nga gigamit sa kapolisan sa dinungan nilang mga operasyon sa pag-serve sa arrest warrants batok ni Apollo Quiboloy sa iyang mga tagonan sa Davao City sa niaging semana? Maong girelibohan ang labing dagkong mga opisyal sa Philippine National Police (PNP) nga nagduma sa operasyon?
O nakuwangan rang administrasyon sa resulta sa mga operasyon kay wa madakpi si Quiboloy? Maong girelibohan ang mga opisyal sa PNP aron sa pagseguro nga ang mosunod nga mga operasyon moresulta na sa pagposas sa alyado ni kanhi Presidente Rodrigo Duterte?
* * *
Mahimo sang nagmatngon lang ang administrasyon nga di moulbo ang mga dumadapig sa mga Duterte. Kay bisan wa ra kumingking sa mas grabeng pinatyanay sa drug war sa kanhi presidente, gipalabi tingali sa Malakanyang ang pagpasalig sa katawhan nga di sama kalaktod ang ilang pagpatuman sa mga balaod.
Kay samtang wa na sa gahom ug di na sama kadako ang influencia sa kanhi presidente, di ganahang mo-risgo ang palasyo sa pagsusi kon ang padayong popularidad ni Duterte igo bang makapalihok sa iyang mga dumadapig sa pag-alsa batok sa administrasyon.
* * *
Klaro nga ang kapolisan sa Davao tua kapusta sa pikas. Kay imposibleng kalit lang na-tagulilong si Quiboloy. Pero problema unsaon sila pagtangtang nga di kapasanginlan ang administrasyon nga nanggukod sa mga Duterte.
Maong gigamit nga rason ang laktod nga pinatyanay human nideklarar og gubat sa drugas si Davao City Mayor Sebastian Duterte. Ug mahimong ang kontrobersiyal nga ronda nakit-an nga laing rason pagbutang og mga polis nga di lang mosikop ni Quiboloy kon dili mobaraw sa ubang mga maniobra sa mga Duterte.
* * *
Imbes malipay nga natay-og ang Malakanyang sa padayon nilang pagdupa ni Quiboloy, ang mga Duterte klarong naguol nga di na magawongan sa ilong ang mga polis sa ilang nataran. Ang kanhi presidente maoy labing nahibawo nga mahimong pantalya lang ang arrest warrants batok ni Quiboloy.
Kay mat-an pa man sa pinya sa Davao, may sukaranan ang pagduda ni Duterte nga ang lahugay hanig lang sa mas importanteng gimbuhaton: Paghawan sa agianan sa pagpatuman sa arrest warrants nga mahimong luwatan na sa International Criminal Court (ICC) sa mosunod nga mga adlaw.
* * *
- Latest
